| Kommentar | I be doch no idd ins Bedd, weil im Radio a Sendong mibbm Miles Davis komme isch, oim vo meine deffenedive Liebleng, wenns om Dschääß god.
Näebebei isch mr die Berfidie vo deam infandihle Diddanekwidzle aufgange. Oir, däe wo in de hegschde fillesofische Heeja schwäebd ond se eibildt, äer mieß dr ganze Weld beibrenge, was Gued ond Schläechd sei; oir, däe wo se eibildt, dass a genau waiß, was dr Wille Goddes sei; oir, däe wo die deologesch Weishaid fier sich bachded hadd ond idd vrschdao ka, wiso gebildede Moslems de Kobf schiddled ibr sei Ziddaad, des wona ganz one Noed von am bidzandinische Kaisar brochd had, däe wo oo ebbs gege de Islam kedd had - voer daused Joor; oir, däe wo mid seir schduere Moralvoerschdellong Milljona in Aids ond de Doed dreibd - so oir wäed mid am ganz oifache Fäkalwidzle raakolled vo seim hoeche Ross, oifach so vo seim moralesche Sockl gschdoeße. Do isch zmaol nix mea do vo seir gaischdege Ibrläegehaid - äer ladd se voll druff ei, äer machze drmid sell lächrlech, ond reagierd belaidegd wie dr kloi Maxl, däe wo se nemma zhelfe waiß. Es isch äer sell, däe wo drmid sein Hailegeschei in dDrecklache wiefd ond zom weldleche Gerichd schbringd ond mibbm Fingr uff dean kloine Dreckschbadz zaiged ond schreid: "Babbaaa! Däe had zue mier 'Hosesaichar' xed!!"
A einwandfreie Selbschmondaasch isches, a äeschdklasseg bildscheane!
Ond i schdimm em DuSenzle vool zue: Dia Âazoig aus Room isch schdradeegisch gseah it schlecht.
Gued gmached, dier kendische Diddaneck-Lausbuaba, dier hendrheldege Sieche ;-)
Aingdle haoni nie ebbs zue am rellegiese Tema schreibe welle in Leo. Weldaaschauongsfäde allar Ard haoni dick. Des isch scho schwäer gnue ond so schnell missvrschdendle sogar in am bersenleche Gschbräch. Drom soll des jiez abr oo a Ausnam bleibe, gell!! Ond aingdle goz ja soweso bloss om Hosesaichar ;-)) |
|---|
