Also hier kommt das erschde offizjelle Ulm-Bulletäng.
En Ulm gibts am Samschdich an schena Wochamarkt ufm Minschderblatz. On außerdem embfiehlt es Zwoisentle no a subber guade dradizjonelle Beggerei, Bäckerei Zaiser, Herrenkellergasse 17, wo mr dene ihr oizigardichs Zuggerbrot brobiera sott! Dia sen meglicherweise schbäder sch ausvrkauft - also: es lohnt sich efendwell, frieher dò zom sei. Dr offizjelle Beginn isch abber nò:
Mir dreffet ons am Samschdich 17. November en Ulm om elfe (11 Uhr) am Haubtpordal vom Minschder.
Des Brogramm sieht ogfähr so aus:
Zerscht machemr an Schbaziergang durchs Fischervierdl zor Donau nonder. Dòdrbei lassemr ons Zeit on gugget ons ausfiehrlich om. Drnòch dädamr em Fischervierdl eikehra on ebbes z'Middag essa.
Aschließend kennamr ieberlega, wammer mit dem ãbrochene Nachmiddag machet. Zom Beischbiel:
Museum Ulm - Archäologische und Kunstsammlungen, u.a. der "Löwenmensch"
Kunsthalle Weishaupt - Moderne und zeitgenössische Kunst
Münster - Kirche besichtigen und / oder Turm besteigen
(Dia hen au älle Indernetbräsenza - abber des kennet'r selber gugga!)
Drnòch kenndamr no em Café Tröglen gmietlich zsamasitza, ratscha on en Kaffee drenka on nòch wieder wia mr oinzln mechdat ufbrecha.
Was mir jetz ganz wichdich wär: dass ihr mit reladiver Vrbindlichkeit saget, ob ihr kommet! Am beschda a Pe-eM odr a Mäl schigga - damit mir em Lokal on em Café reserwiera kennet. Wenn's nòchher om ois oder zwoi et schdemmt, isch et schlemm, abber wenn i fir a Dutznd bschdell on 's kommt bloß a halbs Dutznd, isch et so guat, moin i.
Also bidde, alle wo des läset, meglischt bald Bescheid geba ob ihr kommet. Dia wo sich et meldet, dene schdeig i nò per Mäl oder PM no nòch, abber i wär dankbar, wenn des et so viele wäret....
No ebbes: I be a bissle an Kondrollfriek on dòrom dät i mi fraia wenn i eire Hendinommera hett, damit i eich notfalls au an dem Dag no kondagdiera keet. Vo manche han-e se scho.
