A Jubilääum !!! Und i bin die erschd Gratulantin - Bravo iahr Schwöble und Schwizr !!! Als Guete zum zwaihundredschda !!! 👏🎉🎁🍷🍺🍸🥧

Oh, I just saw you in the Quasselzimmer list - two hundred editions of the Alemanne-Schwobe-Schbage! Congratulations!

Eßdedraile, mei, schö di wiedr amol zum läsa. Ma hôt di letschdns schô vrmißt im Schwobafada. I kriag des allmol net so mit, well i sälbr manchmol dr Fada vrlür. Hoff es gôht dr guet !

Gliggwunsch allegaare ! ... schonn zwäähunnad Fäädelscha !

Danggescheen Faadebabba !

*aangemälldbinn*

Liabs Fädale,

jubilieren graddulieren mechden mir dir heit,

wenschen Sägen dainen Wägen, dainem Herzen Fraid!

(Mit "dainem Herzen" sen mir gmoint, weil: mir sen jò des Herz on dui Säle vo dem Fädele)

On d' Edith frait sich au saumäßich, dass-es eßdedruile amòl widder dòhanna rei gfonda hòt!

Wia schee, da Niggalaus hots Jubiläomsfädale im Sack ghet. Des hotter guad nabrôcht. Und lautr liabnswärte Leitla dinna und sEßdedruile dazua! Wa wellamer meh!? Dankschee Manni und Vegale und und und :-)))))

Schnierle lupf! Boschurle ruaf! Wo sinner au (ihr sinner hihi)

Heieiei, da henna ischs abr ruig!

Bei mir isch etz z Greebschdde vrbei, hoffe mal ...

Na seamr ons widr effddrs.

Bei ons schmilzdd dr Schnäa scho widr - wahrscheinlich isch moara di ganz Brachdd scho widr fudd - ja mei, s isch wia s isch, nuddzdd alz nix.

I hoff, ui gaz guadd ... bei mir isch soweidd alz em greana Bereich, ond etz werre no a baar Loibla bacha: Kibfla, Schogglaadloibla, Kanddudschiini, Anisloibla, Nussmaggroona. Des muaß roicha!

An scheana Aobadd middanand!

(manni, bisch a bissle grääddigg 😉?)

Ahsoo - do deana scho ;- )

"Haz no a Mill, s Kädzle? Gib r no mäehr, wenns no oine geid!"

Hans blieb dô, da woisch jô id wias Wettr geid .....tralala

Wa geids heit zom Nachtässa?

Gibd und wird, so kenn i's au.

Boschurle, Karinkale und Reschd vom Schitzafeschd! I hoff eich gôhts älle guat. 🙂

Alles Rodschr, Mannile 🙂

Also i kenn des scho boides: hòt's no (a) Milch odder gibt's (geit's) no Milch. I han so a Gfiehl, dass "hòt's no Milch" de elder Wariande isch on "gibt's no Milch" dr Vrmischong mit andere Dialektwarianda gschuldet isch. Han me au drieba g'eißert.

Abber obedingt, Missile!!!

Bei ons isch heit Òbend a Hubschrauber a Schdond lang ieber dr Innaschdadt romgschrumblt. Emmer wieder an ra andera Schdell en dr Luft gschdanda fir a Weile. Mr vrmudet, dass d' Bolizei d' Ausgangsschberre kondrolliert hòt on de Schdreifa onna vrròda hòt, wo sich Audo romdreibet.

Abr ofcoorse, Missile. Dohinna kennamer uns dreffa, ohne äbber in Gfahr zbringa. Und du und deine Käbla sin uns wichdig, mir wellad nia und nimmr auf eich vrzichda.

Froee Abfendszeit liabe Schbätzla, groß odr gloi. Bleibed gsund!

Mir genn heit dWeihnachdsgschenkla vrdoila, wells jo nix wird mit unserm Familijadreffa. (Wers Gäbale kennt, woiß dasses meischd Biachr sin). I hommer ibrigens vo meine Englkindr gwinschd, dassemer als Weihnachtsgschenkle a Buach läased. *hihi*

(Dr Hubschrauber war scheinz a Vrmissdasuche.)

(Hanzen gfonde? Isch em hoffndle nix bassierd!)

(Des woiß i net. I han bloß dr Dwiit vo dr Reitlenger Bolizei gläsa, wo se des erglärt hen, damit d'Leit wisset worom der so lang ieber dr Schdadt romgondlt isch. Zwoi Schdond schbäder war dr Eisatz beendet, abber se hent et gschrieba ob se Erfolg ghett hen. Velleicht kommt no ebbes en dr Zeidong morga)

Na graddulier i oifach ens Blaue nei ond wensch glei no a guaz Nächddle!

S'Geburzdagskind isch jetzd a alde Schachdl *hihi*

Dass kann nedd senn, Mon Gäwwellsche !

:-))

Noodräschlisch aach ganns liiwe Gradulladsjoone ! ... unn Aahla und Noadwindscha ...

An ihrm Geburtsdag sen die eldeschde Schachtla Geburtsdagskender! 😉

I meim Herz honne zwoi Schächdala: Ois fr meine Liabschde und ois fr meine Schwäbla! Dankschee Schbätzla! (des hots ibrigens geschd Ôbnd bei uns zom Nachdässa gäa. Selbrgmachde Schbätzla vo da Beirin ihrem Hofvrkauf mit Bergkäs ausem Allgei. Ausem Baggofa (wia beim Manni) und gschmelzde Zwiebla driebr. Sogar em Schose hots gschmeggd.

Sgôht dagega! Diesmôl simmer a Wihnäta ganz alloi, da Schose und i. Hauptsach dKind und Kindeskind bleibet gsund. Und welle jo Hundert wirr, hemmer no viel Zeit um uns älle zdreffa. So isches halt, wenn dBfämili so umfangreich worra isch. I woiß garnimme, obbe eich scho vrzellt honn, dammer diesjôhr im Feb nommel an Enkl griagd honn? Da groß Bruader isch achtzene und jetzt nommel a Butzele. Isch des id schee?

Bleibed gsund, Schbätzla! und eire Schätzla au.

Ibrigens, da Bodaseekreis isch etz an Hottschbôt! Im Langaarger Schbittl zom Heiliga Geischd isch (Scheiß)Corona(mach dassda Land gwinsch) ausbrôcha. 🙁

Liebe Freunde der diversen alemannish-schwäbischen Sprachen, griaßt eich!

Es ist schön zu sehen, wieviele von Euch, die ich persönlich kennengelernt habe, immer noch hier versammelt sind. Ich hoffe, es geht Euch und Euren Familien gut.

Ich möchte Euch allen (ob wir uns kennen oder nicht), trotz Corona Einschränkungen, ein recht frohes Weihnachtsfest und alles Gute für 2021 wünschen, vor allem Gesundheit, und hoffentlich bald wieder ein normales Leben.

Herzliche Grüße aus einer schneebedeckten Welt.

Wenn du in einem Land mit Schnee bist, dann bist du nicht in Schwaben. Dir auch season's greetings.

Stimmt.

Ich danke Dir.

Weihnechde midd Schnäe - des isch ja richdeg klassisch :-)

I wensch dr oo a guede Zeid ond scheane Fejerdäg ui all middand in dr Famille! Ond wenns soweid isch, nocha oo no a guez nuis Johr :-)

S wäed hoffndle in viile Aschbeckd bessr als s ald!

Ojaa, Essdedruile, mir henn die au id vrgässa - so a liabs Mädle wia di!! Häff a werri merri Wienäta un bleib gsund!

Guada Morga au no an alle Schbätzla!!!

Oh, 's Eßdedruile leßt sich bligga! Schee!

Dir au schene Weihnachda em Schneeland!

Ons gòht's älle soweit guat. Oiner vo de Buba kommt mit dr Fraindin zo Weihnachda. Dia sen boide Reffrendar on seit d' Schula zu sen bragdisch isoliert, außer amòl gschwen eikaufa. Des fenda mr vrdrättbar, mit dene zamazkomma. Dr ander feiert in Karanteene - sei Fraindin war letschwoch mit ra Fraindin zsema, die wo nò posidiv teschdet worra isch. Se ganget heit (femf Däg schbäder) zom Teschda, abber a Ergäbnis griagetse ersch nägschwoch.

Mr draget's mit Fassong.

Ja, 's Eßdedruile gugg mol mear dauhanna rei. Des gfreitme oo.

Oos hammr am Wuchaend mit Freund bildlestschättet - bei deane hotz oo Haifa Schnea ghett. A reachts Wendrwandrländ. Abr pferleicht griagmr des ja oo no. Bei ooz hat dr Weddr zwengschd no an Schnea fr da earschda Weihnachtsdag aakindigt.

I hao grad a Kardofflgraddäh gmached. Im Rezebd isch ebbs vo Mill gschdande ond i hao drfier a Wassr gnomme. Abr weils Emmrle gmoid kedd hadd, des sei nix, haoni eingedenk däer Dazache, dass d Mill soweso uss semnedachzg Bodzend Wassr beschdohd, die dreizeh fählende Brodzend ibrschlaxmäßeg im Kobf ausgrechned ond an halbe Teeleffl mäehr Schlagraom gnomme.

S hadd saugued gschmeckd - dr Knofl ond Muschgaddnuss hanz rausgrisse. Die hedd a ganza Liddr Mill idd ersedze kenne :-))

Liabe Leiddla,

i däd ui na heidd scho glei scheane Weinachzdä wenscha. Dassr endschpanndd ond freelich z Nixdoa geniisa kennadd. Oifach a guada Zeidd hand, allemiddanand!

Liabe Griaßla

vom schwäble

Scheene Feiertag, alle mitanand.

I wensch Ui alle an scheana Hailiga Aubad ônd froahe Weihnachdsdääg. Ruhig wedds ja heier vo sell sei.

Bleibat xond!

Isch winsche Eisch aach allegaare scheene Feijadaache und bleiwen gsunnd !

🎄🎄🎄🎄🎄🎄🎁🎄🍾🍜🥩🍗🍾🍤🧁🍰🧀🍾🎄🎁🎄🎁🎄🎁🎄🎄🎄🎄

Frohe Wienäta, Schbätzla! Gsund bleiba, liab sei, Schwäbisch schwätza! Wa wellamer meh?

Unsre Kind henn geschd mit uns Feißtaim-Heilig Ôbnd gmacht. Des war au schee.

Manni, Manni, wer will do gratis äbbes abstauba? Der ka des, wenn Corona rum isch, gern bei mir im Heisle macha. Id dät sogar no da Schdaub fr en a Weile liega lossa! Binne id liab?

Bai ße wei, isch no äbbes vom Kardofflgraddäh ibrig?

Bai ße wei: Laidr idd, mei Gäbele ;-)

Nochdreglech no scheane Feierdäg und em vorraus oo scho scheane Feirdäg - desch ja des Jahr a Folg vo Feirdäg und Wuchaend ohne End.

Kirzlech hauneme mid meim Vaddr ondrhalda ond dau hottr ebbs vo "sellwandr" gsät ("wannr megat, kommadr d'sellwandr"). Desch a Werdle, des i lei no em bassiva Wortschatz hab. Ewig schad. Kennt des vo ui oo no ebbr?

Abr pferleicht wärs ebbes fr osr Werdrbuach. Was moinatdr?

Griaßde, Selima!

"d'sellwandr" kenn i nedd. Was hoißdd n des?

Genao: selbdritt - 1 = selbander (bei oos sellwandr gschbrocha).

I kenn selbander au bloß passiv vom Herasaga, han sogar gar nemme gnau gwisst was es hoißt.

Endressant a Gedanke en meira Eddimologie: dia saget, es gäb an Onderschied zwischa "zo zwoit" on "selbander" - wemmer secht, mr häb ebbes "selbander" gmacht, nò dät des dr oigene Beidrag ("selb") maih betona - also dass mr selber maih beidraga hett zo dem was mr mitenander gmacht hot. Dui subdile Bedeidong han i scho glei gar-et kennt....

Dia wärmr oo nui. Abr endressant, Emmrle.

I hao uff dees hî noml bei de Buebe nochgläese ond ganz vihl regjonale Bedeidongsnijâßa gfonde. Abr s isch ja soweso schon lengr häe, dass däe Ausdruck in dr Alldaxschbroch im Schwang gwe isch - wenn idd amohl sMaisle sein Vaddr nemma richdeg vrschdohd ;-(

Gschmarribäbb - i hau mein Vaddr genao richdig vrschdanda. :-P

[I ond mein Liablengsbaba ned vrschdanda! Pffffffffff!]

Ond wanne so reachd nochdenk, hot am Emmrle sei Gwelle pferleicht doch rechd. "Sellwandr" hottr zua deam gsät, dear was eigndle eiglada isch und der halt da andra no mitbrenga sodd.

Des Nachts da war es besser,

Da waren die Straßen leer;

Ich und mein Schatten selbander,

Wir wandelten schweigend einher.

Hei, heit hemmer wiedr äbbes glernt. 🙂

Ach, was fir a schener Vers, Gäbele! Wo kommt denn der vor?

Ja, deschmr oo aufgfalla.

Ond no a Frog: Was schwätzmr denn oos fr a Neihochdeidsch? En meim Link schdoht, daß selbander v.a. em Middlhochdeidscha ond Friahneihochdeidscha vorkäm. Hernocht zidiertr Heine, Schiller, Keller, Eichendorff ond Feuerbach - schreibat dia no Friahneihochdeidsch?

Neihochschwäbisch - hochsaubrs neihochschwäbesch schwätzsch Du. I schwätz neiniedrschwäbisch mit neihochschwäbische Eischbrengsl - middlrArweile.

Dankeee! Des isch dr mohl a saubre daxonomesche Klassefickadzjoo :-)))

Isch doch allad gued zom wisse, was ma schwätzd!

OT Jiedz haoni a baar Minudda brauchd, biss i des Woed "daxonomesch" gfonde hao. I glob, dees haißba middlneierworbene Dehmenz ;-((

Bitte, gern gscheacha! Daudrzua hommr se ja dauherinna ;-)

Abr bass auf, daßdr ned dochno zvill Balkanesisch neigrauded, wo Du iatzt scho sooo laaang aufm Balkanbalkon leabsch. Obwohl - dia Gefahr isch ja nemme so groaß, balls dau mear andre SchbrachAr gitt alz BalkanesischschbrechAr.

Solangdr des vill schwierigere "Klassefickazjoo" no so leichd iebrd'Libba aka Daschdadur got ...!

Abbroboo Balkanesesch: Dr Hausmaischdr isch uss Saxe, ond dNochbeire midd deane nedde Kend, fier die woni dr Opanachbaa bî, isch ussm Hoechsauerland ;-)

Se kaa abr laidr koi Bladd, woni dees doch so gäere häer.

Nochdrag abbroboo Bladd: Midd am Freind, däe wo vo Fehmarn gwe isch, hammr efdr im jeweilege Dialeckd gschwädzd. Eisre hoechdeidsche Weibr hanze kugled voer Lache *hihi*

Griaß Di, Reevale, schea, daßmear reiguggsch.

Wahrtscheintz kaamrs "selbander" grad so dreaha, wiamr mog. Isch Dir des no a Begriff gwea, des selbander?

Naachn paa Tagn Feiätachsappstinenns vom Peezehh waa miä widda danach, inn deen mia bekanntn Leo-Feedn zu leesn unt mein Semf dazuzugeebn.

Jo, wascheints kammanns dreen wie man will, dass "selbander".

Kanntich abba voaheea nich, musstich nachkuckn wie "unverpfichtet" übrigens auch ;-)

I wasch Wesch wenn a Maschee voll dreggade zsema isch on i Zeit han. Ob des zwischa Weihnachda on Dreikenich isch, isch mir wurscht.

(Was kööt mir denn schlemmschdafalls bassiera, Gäbele? Dass me de wilde Jagd mitnemmt?)

Dr Wotan *hihi*

Fellbr die Gschichd uss ar animischdesche Gegnd z Zendraalaffreka vo deam Missjoohskrankehaus ei. D Schweschdr erkläerd em kloine Michael, äer mieß allad s Obschd ond Gmies gued wäsche voer em Esse, weil do so kloine Vichrla draa seied, die wo oin krank mached. Se seied soo kloi, dassbas gar idd siechd. S Michele ibrlegd kuuz ond nocha moind a: Gell, Schweschdr, abr mier Krischde gloobed idd draa!

Ruddschat guat nômm ens Nuie Jauhr, bleibat xônd ônd freehlich!

Eich alle a guads Neis.

Dir au, hemele, on Faschtfemferle, on älle andere au: a guats nuis Jòhr, on ihr wisset jò:

https://www.youtube.com/watch?v=EWE7IlpgnIA

Also gued, ausgmachd: koi Krachar dees Johr - danke, Emmrle fiers Draadenke ;-)

I wensch ui oo all, dasses s nägschd Johr bessr wäed!

An guede Rudsch :-))

Isch winsch Eisch aach allegaare eh Gudda Ruddsch unn fill Gligg unn foa allem Gsunndhääd imm Neije Joaa !

A guaz Nuis, allemiddanand!

A guads Nuis oo vo mir!

"Abr äerschd amohl holl i mier a Läebrkäsweggle" - moind däe an Läebrkässehml? 😈

... odda filleischd sogaa eh Flaischkääswääg ?

:-))

... dii allabäschde hodd doomools mei Onngell Säbb inn seina Woaschdkisch hinnam Medsjasslaade gemacht ... foa allem waa kää Wägg drommromm ...

Am Samschdig hot dr Gerald Huabr, dr Dialeggt- ond Schborchaschbezjalischt beim Be-err, iebr "haii" (mit vokalisiertm -l-), bairesch fr glatt, gschbrocha ond gmoint _friarnr_ hättmr des em Schwäbischa oo kennt. So a Gschmarribäbb! Bei oos hoißt des heit no heal. Wannz heal dussa isch, sottmr vorsichdeg vor Diar gau.

Guada Morga zom erschda Arbatsdag.

Globbsch Du, daß a Bair en an dezidierda Schwaubafada neiguggt? A Obrschtbair erscht? I globb idd. Pferleicht schreibem Huabr amol.

Haunesmr doch dengkt ghabt ghett, daß mrs dau drvo schomml ghett ghabt ham. I bee lei zgschdingat gwea, daßne oba nauchluag.

As Schdiggle? En Gwarandäne? Moisch?

Als Ausred hald, dassn dr Kretschmann drodz Lockdaun uff de Säe zom Säegle ladd ;-)

S'hôht gschneit :))))))

Dò ooh 🙂

A guets näus Jôhr, an allerschbôteschder, abr net mindr härzlichr Näujôhrsgrueß an di fließige Fädleschriebar !

Am drießigschda Dezembr isch mis Poschdfach überkwellt vô LEO Benòchrichtigunga, und zwor dernige, dia mi per imeehl dra erninnern, dass as an näus Poaschding gêh hôt bi mina abonniarta Fäda...dia meischta waren Schwobafäda, agfange bi Nummer segsadachtzge kwer durch die Fädanummera bis zum hundertnünanünzger. I hôn mi gwunderet, well des jô volle Fäda sin, und wenn e am Link nohegange bin, bin i zmeischtends zmiz i da Fäda glandet, und es war luschdig zum läsa 🤭, was dô alls gschriebe worra isch...manche waren oh Fäda, dia i poaschded ket hôn im Länguadsch Läb mitra Fròg a d'Kommjuniti. A näue Iitrag war abr niana vorhanda...Sacha giits 🙄

Guggus Karinkale, I honn dia Imeehl-Benôchrichdunga id agdiviert, grad welle id will, dass mei Boschdfach ibrquillt und bin froh driebr.

Dir au a guads Neis, mit ganz viele liabe Kiah und Moggala 🙂

A scheas Gedichtle - hosch des sell gmacht?

I be heid scho em Schnea gwea ... desch fei ganz schea rutscheg, worar feschtgfahra isch.

Gwasi. Wobei i moi, daß mr bei oos eanr zum Eis heal sät.

Jô, des isch a schees Gedichtle. I honn da ganz Dezembr scheene Gedichtla gläasa. Ois davo hôts Vegale bedroffa. So schee. Vegale, magsches id dohinna amôle vorschdella?

Weels moinsch? Wenn-e's effentlich schreiba derf, gern!

(Woisch, mei Gedächtnis isch a Sieb.....)

Oh, Opale, desch abber nett, dass mir di mit dem Gedichtle reilogga hen kenna!

Zom Thema gschneit - gschniea: en dera Gegend wo i ufgwagsa ben (Onderjeddenga zwischa Herraberg on Nagold) hòt mr boides saga on hera kenna. En dem Liedle han i allerdengs emmer "gschneit" kennt on gsonga. I gruschtl morga amòl des Liederbiechle raus on guck.

I vrmut dass des reladiv gloidailich en vrschiedene Gegenda wariiert - mòl 's oine, mòl 's andere, mòl boides wie emeim Fall.

I ben au gschbannt was die andere saget.

(On nò geit's no a Wariande mit ma b denna: schneiba, es schneibt)

Em manni seira Fròg dät i mi au no ãschließa: wo bisch du gnauers her? I tibb uf dr Großraum Schduagert.

(...on was mi neigiericherweis nadierlich au no endressiert: bisch du ächt a Opa odder bloß en deim Nick?)

Noch dera Karte wäre ja garidd en Deinr Schbrochhoimat. Was schwätzat nocher dia dauhanna?

An guata Morga, erschtmol dankschee fir dia herzliche Begriaßong.

Erschtens: Manni, bei mir isch des Dilemma, i schwätz meh schwäbisch, als e schreiba dua. Ond wenn i des Schreiba amol ganz richtig fonetisch macha will, ben i emmer am verzweifla, kommt do jetzat uff des A oddr O a Dächle, an Kreis oddr was es sonscht no geit druff. :-(

Zwoitens: Emmerle (derf i des scho so saga) reacht hosch. I ben quasi am Fuße des Wirtembergs gebora worra. Uff dr Alb dädats se me an Hecka.... nenna. I hab abbr au scho a baar Johr em 'Altkreis Nürdinga gwohnt. Ond laschd but not leaschd au fuffzehn Monat en dr Nähe von Minga.

Drittens: Jo, i ben an echter, faiffacher Opa. Ond doher au dr Nick, weil i mir mei kendlichs Gmiat bewahrt ond mei Leidaschaft fir d' Augschburger Puppakischt an mei Dochdr ond mei Enkelin vererbt hau. Ond dia Enkelin hot me, wia se etwa drei war ond se me bsucht hen, gfrogt: „Opa, hosch du au dia Opodeldoks“. Klar doch. :-)

sOndrland vom Allgai aus xäeche hadd frienr do âgfange, wos koin Schdachldrohd fierd Vihwaida meah gea hadd. Abr heizedag geiz oo im Allgai faschd koin Schdachldroht meah, weil se dKieh nemma uffd Waid ausdreibed, sondrn sGreafueddr mibbm Mähladar reimähed! Die däded mäehr vrdabbe als fresse, moind mei Kusâh, däe wo a ganz a moderna vollmaschinerierda Baur isch.

Des mit dr Grabkapell isch fei a guade Idee. Des isch oiner vo meine Lieblingsblätz, vor ällem em Sommr âbends so ab sechse mit ma Buach ond was zom drenka an ra Säule gloint en der Sonn sitza, bis se fascht ieberm Stuagerter Oschta verschwendat. Om dui Zeit isch au nemme so viel onderwegs. Weil se sich dort no vor a baar Wocha schier z'tod dappt henn isch der Zugang zwengs Corona zur Zeit gschberrt. Uff dr Achalm war i oimal en de Achtzger mit meine zwoi Dechdr wo se no kloi waret.

Em Hallo Emil ben i bis jetzt no nedd gwäa. Beim Vorgänger Cassiopeia oi, zwoi Mal.

Zom Gaisburger Marsch sag i bloß ois, wenner guat isch kennt i dren bada. Außer dem vo meiner Muader haune aber blooß oimâl an guada kriagt ond zwar als i 15 Monat en Bayern en dr Diaschpora glebt hau. Do hâts en der Kantine vo dr Kasern am Starnberger See am Wochaende Gaisburger Marsch gäa. Nadierlich waret fascht älle am Wochaende drhoim, blooß i armer Hond hau Dienscht ghet. En derra Riesa-Kantine für a baar Hondert Leit henn sich vielleicht zwanzge, dreißge genauso arme Daggl wian i vrlaura. Des war nachem erschta randvolla Dellr mei Chance fir meh, ganz ohne âschdanda. Am Ende warets femf randvolle dellr ond i hau schier nemme laufa kenna.

Griaß di Dusenzle, des herin het'st scho a schtengan lossn kennan, sovui boarisch dat i grad no zammbringn. ;-)

Zu deinera Frog. „Die Opodeldoks“ waret a wia emmer a vierdoilige Gschicht vo dr Augschburger Puppakischt vo 1980 en dr ARD. Gschrieba vom Paul Mahr.

Manni, des hedsch wega mir nedd wegedidiera miaße. Mir Wirddaberger send doch firs Senga bekannt. I sag blooß Silcher ond Gotthilf. Ond solang se blooß luschdiga Liadla ond koine schwe..ische gsonga henn isch doch älles guad, oddr? ,-)

Opale, i mechd da Dialeggd id ôobedengt vrmischa ...

... oba em Noodfoi koon-e Bairisch scho aa! Ois andre waar jo a blääd noch dera langa Zeid do in Minga.

(zômEmmerlebischbr) Dr Manni hat sênngemäß gschrieba, dass-d die Wierttaberger znachhd ôm Zehne en Gruppa en d Alphitta kommat ond Liadla sêngat (/zômEmmerlerbischbr)

(nommzômEmmerlebischbr) schdermmt dr Hegga ... brônzr?(/nommlzômEmmerlebischbr)

Noi, Dialeggd vrmischa wellat mr nadierlich nedd. Send mr doch froh, dass (no) so viele vrschiedene geit.

Also des mit de Heggabrônzr oder au Heggasch... hot sei Bewandnis do drenn, dass en de Sechzger emmer meh a Audo ghet henn. Ond dia aus Schtuagert, Esslinga, Beblinga etc. dann älle nadierlich uff d Alb gfahra senn ond bei beschtimmte körperliche Regunga dene dann hender de Hegga nochgebba henn. Des hot de Albbaura abbr so was vo gar et gfalla. Seither geits den besagta „Kosenama“ fir os dâ honda.

A Ruafa isch des vielleicht s gleiche wia a Schronda (Schrunde)?

Ja genau, Schorf haune au gmoint. Schronda sen Hauteiriss vor ällem bei trockener Haut. Wia hât mei Muadr älleweil gsait: "Nedd so wia e sag, so wian e moin". ;-)

Des mit de flurbereingte Hegga ond au Feldrain war en dr Rigorosität scho an Fehler. Des waret jo schliaßlich Schutz- ond Lebenszona für Kloiviecher ond Insekta ond hât au a weng dr Wendabtrag vom koschtbare Boda verhendert. Abbr se wellat jo anscheinend zumindescht die Feldrain wiader a weng meh Beachdong schenka.

Opale, des isch die Gschichd vonar Bergwandrong midd Ibrnachdong uff dr Hidde uffm Middag bei Immeschdadd. Die äeschd Bergwandrong fier mei Frischââdraude vo Hamburg. Die vrzell i jiez abr idd deddailierd ;-)

In deam Sadz vo deir Mueddr schdeckd vihl Läebmserfahrong ond induidifs Schbrochvrschdendnis. Des kommba se efdr in a baar LEO-Diskessjona om Kaisars Bard wensche :-))

Ui, i hau gar et denkt, dass i no uf meine alde Däg a beläbende Wirkung hau kennt.

Meine Eltera henn scho a baar Schbrüch druff ghet. Mei Vaddr hot, wenns amol Schtreit onder ons Briader gäa hât: „Wenn jetzt nedd sofort a Ruah isch, nemme dr oi ond schlag dr ander drmit z'tod“.

Mir hennns abbr älle überlebt. :-) Schläg hâts bei ons koine gäa.

Uff dr Reitlenger Alb war i scho länger nemme. I glaob (nedd glaub *g*) z'letzscht uff dr Burg Lichtaschtoi, bei dr Onderhos ond bei Grabastetta ben i durch d' Gustav-Jakob-Höhle kraucht. Des letzschtere isch abbr fascht zeah Jâhr her, des kennt i, weil dr Zâh dr Zeit an meine Schultra nagt, heit nemme. I beschränk me jetzt halt uff Wanderonga mâl uff dr Ostalb (Drei-Kaiser-Berge), mâl en der Weilheimer Gegend (Limburg, Zipfelbachtal, Broitaschtoi), mâl em Lonetal oder ganz oifach bei mir en dr Gegend em Schurwald.

Manni, du hâsch uff Grund von dem oina Satz mei Muadr richdig eigschätzt. Sie hât abbr au no a ghörige Portio Humor ghet. Ond Gedichte hât se au gschrieba mitm richdiga Gfühl firs Versmaß. A weng drvo hât se mir vererbt.

Mei Muadr hot oo so Weisheita:

Wear aubnds laang furt ganga kaa, kaa endr Friah au aufschdanda.

Wann ned glei zom blärra aufhearsch, nocht schmiere Dir oina, daßd woißsch, warom d'blärrsch.

Zu denne (nedd blooß LEO) Diskussiona gilt halt au meischtens der Satz vom Karl Valentin: "Es ist bereits alles gesagt, nur noch nicht von allen". ;-)

Ameisl, ja genau dia zwoi Schbrüch senn au scho amâl vorkomma. Abbr selta, mir waret jo emmer brav.

Hoppala, jetzat isch mr doch schier mei Scheiheiligaschei verrutscht. ;-)

:-)

Dau gugg, ich ruckdr dein Hoiligaschein mear grad ():-)

Merci vielmols, des isch liab. Nedd dasser gar no nahaglt ond a Dalla kriagt.

Buale, des kemmr ned vrantworta. Am End leichdedr nochd nemme ond ds Opale vrlofft se, wo's doch scho kuahnaacht isch.

Griaß eich Gott älle mitanander,

dass jeamerds Buale zu mr sait, hôts scho lang nemme gäa. Dô fiehl i me doch glei om a baar Jährla jenger ond schtärker, i kennt grad an Grashalm rausrupfa. ;-)

Mei Schiinglisch ond mei Denglisch send au besser als mei English. Des haune en de sechzger zwar en dr Schual ghet, aber do isch blooß onderkellert worra ond nôchher haune vergessa a Häusle druff zu baua. Abbr emmerhin haunes gschafft 1970 mit ma Schualkamerad uff seiner Herkules K50 Sport nach Cardiff zu fahra. Erhôt gar koi English gschbrocha ond hôt mi als Dränslätr braucht, sonschd wärs mit dr Onderhaltung a weng schwierig worra. Der Kerle hôt em Wendr drvor beim Schifahra en Tirol a Mädle aus Wales kennaglernt ond nach Briafwechsel übers Jôhr (iebersetzt vo mir) hôt er se bsuache wella. Gsagt ond doa. Des war a luschdige Fahrt, wenn mr dia zeah Platta am Henderreifa drbei vrgisst.

En Deitschland hôts jo noi koi Helmpflicht gäa, aber uff der Insel scho. Mir henn also Helm drbei ghet ond se au scho ab dr Abfahrt draga. Blooß oimal scho en Cardiff fir an ganz kurza Trip hend mr se vergessa. Nadierlich semmer vrwischt worra. Dr Offissr hôt ons ermahnt mid folgenden dragenden Worden: „Yuo must wear helmets. Because if you have an accident i must pick up the pieces. I hau den Satz ond dem sei schelmisches Grinsa heit no vor meim geischtiga Aug wia wenns geschtern gwäa wär.

Ach ja, wegam vrrutscha vo meim Scheiheiligaschei. Frieher hätt i den jâ no mid meine Hôôr verflechda kenna, heit gôht blooß no feschttaggera. Ja, ja, auch ich war ein lockerer Jüngling mit Haar! Oddr wars anderschrom? ;-)

Also Gäbele, des Gedicht hòt mei Mudder et gschrieba sondern ufgschrieba. Desch vom Wilhelm Busch - ebbes dodal anders als was mr susch vonem kennt, Lährer Lempel on Max on Moritz on dui fromme Helene on so weider.

Als jonge Frau hòt mei Muader a Biechle ghett, wo se dia Gedichde neigschrieba hòt, dia wo eahra gfalla hen. On des handgschriebene Biechle hòt se fir mi in a anders Biechle abgschrieba.

Des Gedicht wo em Gäbele so gfalla hòt gòht so (on weil dr Wilhelm Busch scho lenger wia siebzg Jóhr dot isch derf i des dòhenna neischreiba):

Wärst du ein Bächlein, ich ein Bach,

So eilt ich dir geschwinde nach.

Und wenn ich dich gefunden hätt'

In deinem Blumenuferbett:

Wie wollt ich mich in dich ergießen

Und ganz mit dir zusammenfließen,

Du vielgeliebtes Mädchen du!

Dann strömten wir bei Nacht und Tage

Vereint in süßem Wellenschlage

Dem Meere zu.

Wilhelm Busch

Ersch grad gsäh: ach, desch amòl a romandischs Gschichtle, Femffachopale! (Wemmer amòl vo dene Bladde absieht....) On du hòsch als Drensleder dui Entwigglong vo dera Romanze hautnòh vrfolga kenna!

Vegale, merssile, gnau des honne gmoint ghett. Wenns vom WB gschrieba worra isch und id vo deinera Mamme fr di, not hotts wohl a weng a andre Bedeitung. S’isch abr wellawäag schee.

Fimbfachsopale, desch fei idda schlimm, wennda nimme soffl Hoar aufem Grind hosch. No hotz scho koine in da Subb wenda kochsch. I bin ibrigns au a eldrs Semäschdr dôhinna – mit ällem, wa dôdamid zämmahengd: Graue Hoar, Falta, Hängebagga im Gsicht und sonschwo usw. …….. sVegale und sAmoisle und sSenzle sin dô no a wengle jingr (abr bloß a wengle, hihi).

Morga genn da Schose und i middam Briadarle und seim Schätzle wanderra. Mr fahred mid zwoi Kärra und laufa dommer mit fimbf bis zeah Metr Abschdand. Mr wellad id bscheißa, sonsch wird des mid dem (Scheiß)Coronabekämpfa nianix.

Bossoarle! Da Schose und i ässed heit Kässchbätzla mit Bergkäs, ausem Baggofa, wias da Manni macht.

Gäbele awa, des mit de Hôôr macht mr nix aus, i han hau jô als Jonger bis zom Barras a Matte bis zom Girtl ghet, drfier wachset se jetzat halt an Schtella vo se nedd nágherat, halt blooß nedd bis zom Girtl . Ond Eitelkeit lässt halt wia älles andere au nôch.

Kässchbätzla mach i au em Backofa. I woiß et wian ihrs machet, i môg se halt net wenn se fuurzdrocka senn. I röscht Zwiabla ond gwürfelta Schbeck em Topf â lösch se mit a weng Sahne ab, lass dô dren griebana Käs schmelza ond giaß des en zwoi Schichda über dia kochte Schbätzla en der Ufflaufform, nomml griebana Käs drüber, Backofa, fertig. Fir andere Warianda ben i abbr au offa. Halt a weng sämig miaßet se sei. Eich winsch i bon appétit.

Leggr wars! A Schissl Salôt dazua, mmmmmmmmmmmmmmm

Asso, frianer honne ammel dSchbätzla nochem Kocha middem Schaumleffel ausem Kochtopf gfischd, in a Schissl gäa, Spätzles/Reibkäs driebgschdreit, dia näggschd Lag Schbätzla middem Schaumleffel ausem hoißes Wasser gfischd, in dSchissl gäa, mit Käs bedeggt usw. Auf die ledschd Schicht sinn nô no gmschmelzde Zwiebla driebrkomma. Jetz machese bloß no im Baggofa. Dei Rezepd liasd sich guad (außerm Schbägg). Abr fr da Schose kennde des aumôl brobiara.

Dô pflichde dr bei, Vegale. Fr da Schose, fr da Schose ! 🙂

So, i gan jetz aufs Schessloh und lies no a wengle i meim Buach weiter. Si juh!

An guada Morga ällemitanander,

noi Emmerle so arg uffgfalla ben i dô drmit nedd. Send jô no gnuag andre en de schbäde sechzger ond friehe siebzger drmit romgloffa. Blooß mei Ausbildungsleidr hot me môl zu sich bschdellt ond gsaid: „Also Herr … mir hend jô nix gega lange Hôôr, abbr pflegt miaßet se sei“. Woane dann gsait hau, dasse se jedn Morga wäsch, hôddr nix mei gwißt ond i hau wiadr ganga kenna. En meim graua babbadeggl isch no des Foddo dren. Ond wenne môl wiadr en a Vrkehrskondroll nei komma ben, hend dia meischde Bolizischda grinst, au dia jonge, dia dô no gar gebora waret, ond gsait: Des waret no Zeita. ;-) Leider isch der Babadeggl schbädeschtens ab nächschda Januar nemme giltig. :-(

Zua de Schbätzla. Dia âgröschdate Schbeckwürfl ond Zwiebla lösch i vor dr Sahne no mit ma Schugger Riesling ab. Dr frisch gmahlene schwarze Pfeffer haune au nedd erwähnt ghet. Em Backofa lasses bei 170° etwa 20 Minuta bis dr Käse oba a weng a Färble griagd.

Schessloh haune au scho lang nemme ghert. ;-) So hôts bei ons drhoim au no ghoißa. Ond bei dem Wort Schessloh fälld mr emmer gei dr Heinz Erhardt ei.

So, jetzat miaßet i mi amol vrsuacha menschawirdig zu gschdalda, damit mr mi ondr Leit ganga lassa kâ. I fahr heit gschwend uff d' Alb zu meiner Dochdr. Mr woiß jô nedd obs en a baar Däg no meglich wär. Nadierlich ondr Eihaldong äller Hygienemaßnahma (jetzt haune grad scho Hyänenaßnahme gschrieba ghet). Noi so schlemm isch d' Familie vo meiner Dochdr nedd. ;-)

I winsch ons älle an scheena Dag. D' Sunn scheint schau, uff dr Alb hoffendlich au.

Bin zwar bloss ein austrofihla Lörka hier, aber bei Euch mitlesn is fast so unterhaltsam wie ein Witzefaden! :)

Also i fend ons bei weiderem niwoovoller wie jeden Witzfada! I han scho a baarmòl fir a Weile ema Witzfada mitgläsa on ben emmer widder ausgschdiega, weil's frieher odder schbäder en a fir mi et erdräglichs Niwoo von Seichtheit abgleided odder ägglich ordinär wird odder boides zsema.

(A weng schbäder:)

Also d' Edith hòt gsagt, i soll no schreiba, seicht wäremr scho au äls amòl, abber ordinär et. 😉

Heggschdns eggschdraordinäehr, Emmrle ;-)

An saggrisch miada guda Morga ällemitanand,

i han heit nacht so an wirrs Glomb draimt. A reachdr Alptraum. Am Schluss haune mei Auto nemme gfonda ond des hôt me dann uffwacha lassa. Normalrweis drehe me dann om ond schlôf weidr, aber was mach i Bachl? I denk ieber dia oinzelne Szena en dem Traum nôch. D' Nacht war romm ond i häng jetzat dô wia an Schibbasechzer.

Bei de Schbätzla send mr ons jô zumindescht em Schichda einich. Wer schabt se denn vo uich vom Brett? Kâ sei, dass ihr des scho kennat, en dr Tjube geits zom Schbätzla schaba a luschdigs Video „making of Spätzle“ wo d' Oma Lutz ihrm Enkel 's schaba erklärt.

Heit morga isch mir schbontan a Wort eigfalla des mei Schwippschwogr ausem Beblinger Kreis emmr gsait hôt: „neanich“. Außer dort haune des abbr no neanich ghert.

Guada Morga, ui egschdraorinäre RatschAr ond ReileasAr!

Bei oos hoißt des "nianats", opale.

Ond bei eis haißd des "neanadz".

Eisre Schbädzla fier dKäasschbadze wäered idd gschabed. sDuSenzle als Ondrlendare legd Wäerd druff, dass die Knebfla haißed. Abr mier saged Kässchbadze - in däer Wordkombenadzjiô maischdns sogar ohne des wieddebäergesche Dimminedifle ;-)

Wemmas schabed däd, mihßbas ja drnoch no in kuuze Schdickla schneide. Die Arbad schbare mier midd am Schbadzehobl ;-)

Ha Manni, ná senner jo dobbld faul, beim schaffa ond beim kaua. ;-)

#156: Mir sen abr gar net witzig. Mir schwätzed halt so.

Gehts eigentlich bloß mir so, daß i des Gedichtle vom WB recht sexistisch find?

@ witzig - dWienar fendedz Schwäbesch-Allemannesche hald witzeg ond d auschdro-bajuwaresche Schdaadsmajoredäd machd gäere Widz ibr dGsibäergar ond dAllgaiar Schbrochmendrhaid im Tannheimar Tal. Abr ibr dTrollar scho oo.

Bei deam Gedichdle gohz mier idd so. Was fendsch du do sexischdesch?

Des mit dem "Ergießen". Wia alt warn dr alte Hageschdolz, wianer des Gedichtle gschrieba hot?

Ja. Gedicht leabat vô dr Endrbreddazjooh.

I däd dr den Artikl empfehla, Emmerle: https://sz-magazin.sueddeutsche.de/leben-und-...

Mi schtört des Wort Ergießen, des hert se - fir mi - doch zu sehr nach ner Ejak******* a.

Des haoni mier beim nomohl Nochläese denkd, dass du des denkschd.

Abr des hadd allad no nix midd am Missbrauch von ar Sibzehjährege zom doe, odr?

Do hen mir pferleicht onderschiedliche Asichta. Des mechte abr net in am öffentlicha Forum diskutiera.

Okeh, agzebdiert, nò lassemr-s am beschda oifach ruha, eivrschdanda.

No gibts heier koin Tripl-Sieger.

Hät mi au gwundert.

Näana isches so indressant wia dohinna. I hommer grad nommel des Gedichdle vom WB agluaget undme gfrôgt, wägawarome des wedr säxischdisch no erodisch gfunda honn. Jô, welle vonama ganz andra Gsichdspungd ausganga bin und wahrscheinz auno, wells Gäbale reinen Geischdes isch (gä, Manni). Des middem Ergiaßa und Zämmafliaßa honne assa Art Ossmohse zwischa sich ganz nôschdandende Persona empfunda. Me bewegad im Hira wohl andre Gedangka ass vielleicht da WB sellmôls und sHimmale heit. Abr, wia scho sVegale gsait hot, lemmer des Thema.

Leitla, schneit und da Schnee isch kalt beim "midde naggade Fiaß da Milleimr reihola" und swared bloß Bfiaß nagged - i schweers !!

Griaß eich Gott älle mitanander,

jetzat hetts me schier vom Hoggr gschlaa, "Holzbein Kiel" haune no nia nedd ghehrt. :-))

An gscheidr Schnee däd mr au amol wiadr gfalla, abbr bidde erschd nägschd Woch, weil i no Kehrwoch bis Samschdich hau. Ond wenn Schnee, dann so zwanzg, dreißg Zendimedr ond drnach femf Wocha eiskalt ond sonnig. Do macht an langer Schbaziergang en dr glitzernda Wendrwondrweld erschd dr reachde Schbass.

Kennad ihr eigendlich au dia schwäbisch Form vo ra Eiladong: "Kommad au glei nachem Middagessa, drmit er zom Kaffee widdr drhoim send"?

Gäbale! Schweschdr em Geischte! ... oder am naggada Fuaß :-) I loff oo allad no baarfiaßeg zom Briafkaschta ond zor Tonne.

I bêee de dritt, wo ohne Schdrempf ônd Schuah en da Schneah gaht ... ;-)

"Holzbein" han-e geschd zNaachd au z erschdmôl gleasa - i lach allaweil no driebr.

So sei, mir gewährat dia Bitte, en oosrm Bund die Dritte :-)

Danggschea! :-)))

Barfiaßich em Schnee, gwehnlich ehr nedd, allrdengs nochma Saunagang barfuaß bis zom Hals em Außabereich en dr Schnee liaga, des isch scho ganga. Des reglmäßige sauniera vermiss i scho a weng. Des war bis vor a baar Jâhr mei Sonndagsriläckseischn, erschd zwoi Schdond Bädmindn schbiela ond nâ drui pflegde Saunadurchgäng mid scheene Ruhephasa drzwischa. Hendrher wia nuigebora.

Irgendwo em Hendrkobf haune dia Erdawelt au gschbeichert, des muaß abbr scho arg lang her sei, dasse des ghehrd hau.

(flyschder, zo mier) Mir scheint's bald, i ben fascht 's oinziche Woichai on de oinzich Warmduschere dòhenna....(flyschder, zo mier \off)

Emmerle, muascht nedd flyschdra. I bekenn me offa zom warm- oddr hoißduscha. Kalt goht blooß nâch dr Sauna oddr em Sommr an ma See wos a Dusche geit, drhoim nia nedd. Abbr Klobabier vorwärma duane fei nedd.

Klobabier vorwärma - i schmeißme weg :-))))))))))

Vegale, dia "Erdawelt"-Vrschdärkung kenni id.

Opale, woisch, des middem nagged in Schnee neiflagga däte scho au, abr wellsemr jetz meine viele scheene Bämm wägada Elegdrifizierung vo da Bah gfällt honn (i heil allno), gôht des fei nimme. Abr, i kennd jô warta bisses Nacht wird - Amoisle und Senzle, machader mit?

Em Gaischde scho, Gäbale. Abr en meir Realidäd miaßt i vom Haus naus andr Haubtschdross lang enda Garda hendresche ond des ... naggabudzlat ... ? I woiß ned?!

Grad haunes saga wella.

Mädla, ihr miaßdet eich bloß draua. Dia oi goht schtolz erbobnen Haubdes en dr Garda ond ernded stürmischa Beifall vo de Vorbeifahrende ond bei dr andra muaß Bâh sogar no Sonderzieg eisetza wega dr gschtiagana Nâchfrâg. Ond boide kennat sich drbei dengka: So Leit, jetzat seahnd 'r endlich mâl was reachts. ;-)

I wär de Dritt ônd dääts middr Inge Meysel halta (kennt dia no epper?):

Dia ha zHamburg a Willa an de Elbe ghett ônd isch zNaacht allad naggad emm Fluss gschwommôma; zurugg isch se zFuaß gloffa.

Irgend a Rebordrle hat se nau gfraugat, ob se koi Angscht hett, dass-d se epper siehght.

Nau hat se bloß gmoint, wer dau nâaguggt, sei sell schuld.

"Uf dr Eardawelt" kenn-e au it, abr "auf dr ganza Welt" scho.

Dia Gelassnheit feahltmr no. Abr i bee draa :-)

[Ond glar kenne dia no ...]

Nadierle kenna mr dia "Mutter der Nation", schbäder wars dann Muaddr Beimer.

Ond wegam so nausganga, dät i saga, koi broblem, bei dr Masggabflicht kennd oin jâ eh koiner.