Guade Morga midnand.

Abr, wia scho gsagt, an Froleichnam sen bei ohs koine Feria meh.

Guda Morga!
Jesasle, neidrino, du bisch aber arg friah auf heit! Hôsch womeglich an Ãfall vo bräseniler Beddfluchd ghett heit?
I wär gwieß no em Bett wenne net rausmiaßt!

danke, manni, des hôscht schee gmacht, des nuie Hõigäätle!

Guate Morge!

Ja, so a scheas Gärtle, manni:

http://www.schellheimer.de/se_data/_filebank/...

Goldammer, eher bräsenile Schlâflosigkeit ...

Guada Morga candice.

... odr a schlôflôese Bräsenillidäd?

Manne, i hoff inschdändig, dass bei mir die Bräsenillidäd emmr no bloß a Beiwort isch. Deswega liabr doch bräsenile Schlâflosigkeit.

Du hasch gued, neidreno!
Bei mier isch es wirkle scho a wäeridable Agrypnie, uff gued Deitsch: Insomnie ;-))
Abr i nemms vo dr bossedive Seidte: Dr Dag isch vil lengr!!

So, 7ne isch un dia gloi Bagaasch isch futt. Wared aaschdrengend dismol; s'Dings isch vor Erschepfung scho aufm Kanapee vrpennt un i schbier, wia d bräsenile Bettdrang afangd zlogga. Schdiggle, wennda wit, griagsch vomr a bizzle Schlof ab. Diesbeziglich kaane me id beschweara, un wenne mol nachds aufwach, no freie e me so, dasse im Neschd lig, dasses koi Broblem fr me isch.

Manni, griagsch au a bizzle an Schlof vomr, ganz fr nix, ganz umsonschd. Bischmr no wiadr guad?

Nommel Edith: Dankschee fr den Neia.

Moi Gäbele, dier ben i doch no nie id bäes gwe! I hao de doch bloss zuer Gaude a bissle drädzd!

Bei mir hoißt des "driezd".

Wanne de scho immr hon froga wella: Wa isch eigndlich mit deim Knia. Bisch nagfloga odr isches Arthrose?

Uff mei Knie isch mr a Modorad druffgfalle. Nô send alle Bendr hi gwe, außr deam ussre. Nôch am Jôr ben i ausgrudschd uffm Schnäe. Ond weils Knie bloß bis zue hondrd Grad nôchgea had, isch dr Obrschenklknoche broche - d Deckdr hand Femurfrackdur xed. Seideam kani s Knie bloß no biß zue femfeneizg Grad abiege. S Radle gôd gued ond ischs beschd drfier. Bergschdeige ond Schifare gôd nemma. Ond lang loffe isch oo nix.

drädze isch uff Hôachdeitsch necken, bair. tratzen. A Amüsegöl isch a Gaumedradzer!
I glob id, dasses triezen isch.
A Katz ka ma drädze mid ar Fadeschbuele, die wo ma allad mea schnell wäckziechd, wenn ses fange will.
Ond a Katz drädzd d Maus, die wo se gfange had, wenn se se a bissle frei romloffa ladd. Ond grad, wenn d Maus moid, iez ka se ens Loch neischlieffe, haze d Katz scho mea beim Schlawiddle!

A so! Du Armr. I hon gmoind, i kennt dr an guada Rôt gea, abr in dem Fall it.

Des mitm drädz kaufe dr grad ab. Du bisch d Lährer. Irgendwia isch mei Schwäbisch nimme so seite im "Feindesland" wohn (Schesä, gugg weg!!) *g*

Guad Nacht Manni
un dia wo no reiluaga

Guad Nacht Manni
un dia wo no reiluaga

Oi, etz honne au an zdicka Fingr khett. Ma sott sich do nia ibr äbbr luschdig macha, odr svrwischd oin säll.

Des haoni no en Wädrbiechr gfunde:
trätzen - frotzeln, necken, hänseln, sticheln, spielerisch ärgern

Was dier Wieddebäegar bloß allad mid deane Badenar hand! Odr hanz Badenar äjer mid ui?
Grad wie d Schweizar midde 'chaibe' Schwôbe ...
Ond a bissle mier Obrlendar midde Ondrlendar ...


Gued Nachd, Gäbele!

Gescht Nacht hon dr Manni un i d Fada zuagmacht. Etz mach'n wiedr auf:

Guada Morga liabs Ländle, Alemanna, Alefraua un an scheena Dag no :-)

Wo bleibt denn aingdle Zelima? Isch die todaal en dr Arbad vrsombfd? Idd amôl z Middaag hazese gmeldt!

Isch äbbr dâ?

Neamad! Bloß i.

Wenn neamrz dâ isch, lohnt sich 's jâ net, dass i bleib ...

;o)

Wo send denn die ganze Fehla? Allad mid de Dengs romrandschle!

Vileichd soddebr glei middand gao, neidreno. Wo gammr nã?

Biergarde hât sich jâ erschdmâl wiedr erledigt. Grilla au. Hmmm, wa mache mr dann blooß?

Komm zue mier, dô isch no a Biergadeweddr. Hock di en dein Kare nei, de Bleifueß hasch ja em Schbord dreniert!!
Sosch legsch hald an Zieglschdoi uffs Gas ;-)

Schduegert - Mencha ... hao i schao amôl en 63 Minudde gschafft ... isch abr schao lang her.

Abbr wär bled, i miaßd jâ wiedr zriggfahra. Ond dann lohnt sich des mit em Biergarde net. Ond en zwoi Schdond isch es bei Dir au z'kiahl fir da Biergarde.

Scho lang häe? Dô wäez no id so vil Aodo kedd hao. Odr bisch am Samsdag schbäd en dr Nachd gfare? Normalarweis geiz doch uff dr Schduggardar Audobã allad an zäflissege Vrkäer.

Und auf jeda Fall vorm Ausbau Augschburg - Mincha. Seits do bauan derfsch bloß no achtzge fahra.

Jetz hotses do au zuazoga, guat dase no voher auf dr Dult war.

I hao grächend ab Flughafa (dâ be e jâ scho am Schduagerdr Kreiz vrbei) bis zom Audobâhend an dem Kreisverkehr en Mencha. Ond 's war amma Feiordag âbeds.

A so räechnsch du, schdiggle? Ja wenn i so räeachn, no bi i in ongfäer a halbe Stund z´Minke - Audobahanfang bis Audobahend. ;o)

Abr jetz isch scheintz koinr mee dâ. Dann wensch i au a guade Naacht.

Candice, naja, abr 's sen genau 199 km.

Ond i hao dâmâls so grächend, weil e am Flughafa no tanke war.

Ond jetz gang i endgiltig.

Schlof mea guet, Schdiggle - I gang oo (mibbm Buech, abr ohnen Dengs, der hot Iebrnachdongsdienschd am Mondag :-()

Iez haon i grad a baar Ardickl ibre Klinsmanns Rausschmiss z Minke gläese. Es isch wie so ofd: S isch leichdr, fier oin Dränar an Ersatz zom kriege als fier zwanzg Fueßbalar!
Ond ansonschde druck i de Augschburgar de Daume, dass die en dr zwaide Liga bleibed.
Soviel zom Fueßbal!

Abbropoo Buech: I wäer me mea ibr mei Ãlaidong fiers Kiibôed häemache ond weidr an meim äeschde Schdickle iebe. Dschogging fiers Gehirn (solang i no ois hao!)
Bis schbädr!

Wäe nemma rei kudd heid, deam wensch i oo a guede Nachd!

was hôschn du nôch mit deim Hirn vor, wennda drmit rechnasch, bald kois me zom han??? ;-)

(Desch mei Beitrag fir da Dag - schbricht au net grad fir bsonders viel Hirnsubschdanz, oder?)

Hey Emmerle: was hôschn du nôch mit deim Hirn vor, - ja des wemmr iez grad eifalle däd ... hm?


Guez Nechdle an ui all ...
... ond a guez Aufwache moanammôege!

Dassbr mea uff die äeschd Seide kommed ond dier all gued häefended, schreib i ui no, wie des mid meim Kiibôed weidrgange isch:

'A11'=Piano is automatically selected ... To confirm that is the case ...

Beim Einschalten des Instruments wird jeweils der Klang 'A11'=Piano angewählt. Wenn Sie uns nicht glauben, drücken Sie den SELECT-Taster ...

Also i globs eana, abr id weil i SELECT druckd hao, sondrn weilses faschd grad aso wie a richdex Klawier ãhäed. Gar id almôl so schläechd!

Em Momend ieb i grad lenks C - G⁷ - C ond rächz embrowesier i ebbs drzue - mei isch des schea ;-))

Môere kommd nos Äff drzue, ond nô kani scho die ellemendar Kadenz I-IV-V-I ! Toll, gell?
Bue, dô gfraid ses Hiere!

Em Momend ieb i grad lenks C - G⁷ - C ond rächz embrowesier i ebbs drzue - mei isch des schea

Ond wia hâsch en dann no tippd?

Mid de Zäecha! I be so gäere barfueß - zwengs deam Lemburgargschmäckle ond als Vôerberaidong fier d Ôergl. Dô brauchba oo dFieß!

Isch des dann ned bäbbig odr a weng rudschig uff dr Daschdadur?

Scho, abr des isch a reine Iebongssach. Middr Zeid brengba des scho raus, dass ba die Daschda schea werdekal druckt, nô rudsched Zäecha vo sell en die Vrdiefonga nei. Ma brauchd hald oo a gscheide Daschdadur! Dô dääfba id am falsche Fläek mibbm Gäeld schbare, oo wemma a Schwôb isch! A guez Handwerxziug mueschd scho hao!

Aaha, des bäbbig ond rudschig hao i hald wega em Lemburgar gmoit.

Schbilsch du oo a Enschdremend?

Ädidd:: Des mibbm Lemburgar haoni scho vrschdande - i kenn ja des Broblem vo de Ãfengar noo!
I kã mi no gued drã erennre - des Hieredschoggeng wirkd scho!

I a Enschdromend? Hmm, zähle Schdereoâlag odr Empeedreipläja als Enschdromend?

Halt, Audoradio kâ e au.

Noi, noi, die gelded all idde!! Midd deane ka ma bloßeg räbbrodeziere. Abr i glob, i hao di des scho amôl gfrôged kedd ond oo dômôls koi andre Andwôed id kriegd ;-(

So schnell hao i hald koi Inschdromend glernd. Abr i hao a Klavier, zehlt des?

Zue was hasches nao, wennz id schbilsch? Fier des neidriniddo? Soll s Kend mea alls rausreiße, was dr Ald vrbocked had!!

Dr Ald? Manne, Du lernsch es nia!

Zu was es hao? Sieht hald guad aus an derra Schdell. Ohne des wär's dâ a weng kahl.

Etz muene doch no schnell reigugga. Hon eich id vrgässa khett. S'Dings isch etz scho zwoi Ôbnd vorm Schläpptop ghoggt, weil sei bleeds Nintendo schdändig d'Liäson hie machd un i drum in d'Lufd gugga hon miassa. :-))))
*binschowäg*

Jawoll, drrr Ald! Em Schwäbesche ond en de andre Dialäckd, sogar em Hôechdeidsche, ondrschaided ba zwische Genus ond Sexus, gell! Ond weil des fier d Schwôbe a bissle zãschdrengend isch, i waiß ja säel, henkebr a -le henda na, nô isch alls s - abr bloß em Genus. En dr Wirklekaid kennebr scho de Ondrschied zwische Mendla ond Weibla, sosch gäbs ja koi neidreniddo, odr?

Nô isches mid deim Klawier amend so wie bei mier mid de Biechr: Se vrbessred d Raumackuschdick õgeheier ond s machd ebbs häe, wemma Bsuech kriegd!

Moi Gab, Moi Gab ... wer bisch au Du?

He Moi Gäbele, du bleibsch dô! Abr soford!

Ja, ond 's neidrinido schbield ond des Vo-N au a weng.

Manne, woher willsch Du wissa, dass i ned dui Ald be?

neidreno, d Moi Gab isch doch die, die wo ma allad bloß vo henda siechd wenn se d Schdieg naufschbrengd mibbm Buech ondrem Arm on em Dengs vôer sich. Kennsche nemma? Des Hendrdail isch doch õvrwäxlbar!!

@ 53 - Des isch hald mei Enduiziõ, die wo mr sed, dass se a Weibsbild Lemburgarfieß (ond Bleifieß) gegnibr andrsch eißre däd ;-))
ma(nni) had so seine Erfaronga xammled em Läebe ;-))

Abbroboo Klawier:
Nôchm Krieg send d Hamschdrar end Däefr komme ond hand alls, des wo se no kedd hand, en ebbs zom Äesse omdauschd. So isch o dr Waibl zue nam Klawier komme. Dr Nôchbaur haz ãglueged ond uff a weiße Daschde ond a schwaze naufbadschd. Nô haddr Waibl zuenem xed: Du kasch ja Klawierschbile! Dr Nôchbaur druff: Ja grad merk is sell!

Au Manne, 's geit abbr au Weibsbildr, die wo au gern schnell Audofahra dent. I woiß des gwieß.

Sag bloß, zue de Lemburgarzäecha felldr koi Ausred id ei ;-))

Des isch a Thema, des will i net vrdiefa, weil 's isch halt a bissle ârichig.

Ond jetz vrabschied i mi. Schlâf guad!

Du oo! ;-))

Guat Nacht beianand, wenn-dr scho alle schlaufat!

I schlauf no id. I hao grad sueddeutsche.de gläese.
Bisch no ommanand, DuSenz? Ond soschd oo no ebbar?

DuSenz, widde id endle amôl zom Schdammdisch ãmelde, ha?

Hoi, ihr Nachtschwermer, i gang nô au bald.

He, ier Nachdschwermer, Zeid isch zom aufschdau!
D Arbad isch dao, s Äesse isch gäesse, d odr dr Dengs isch scho am Läese odr flacked zom Rueßle uffm Kanebee ond mei I-IV-V-I gôd allad bessr. Heid amôl one ãrichige Fueß- ond Zäechearbad, em neidreno zlieb! Nô kennedr ui reidraue one Neesklammr - ächd!

Ächd? I be dâ liabr a bissele vorsichtig ond bleib no a weng em Dierrahme schdea.

mei I-IV-V-I

???

kandis, des isch irgendwie dui Glafiermusik wo dr manni macht.

Entschuldigat dass e me so rar mach, i ben irgendwia a bissle em Schdress zur Zeit. Net schlemm, aber grad so dass e net viel Zeit han zom gmiatlich em Leo romschdragga.
Mitlese dur-e aber uf jeden Fall, zmindescht 's meischde.

He neidrino, kasch one Schgrubl reikomme! Des Barakaseinkalzium haon i end Käskuche brôchd, Bfieß send frisch gwäsche ond nemma rudscheg, sodass i em Momend laidr grad id gleichzeideg Klawierschbile ond schreibe kã.
Widd id oo s Klawierschbile no ãfange? S machd ächd Schbass, wemma koin Laischdongsdruck id aufbaud!

candice, lueg amôl end Nommr semnedreißg. Dô schdôd des middr Kadenz. En Zäduer wär des nôcha d Ackordfolge C - F - G⁷ - C. Wemma des uff dr Giddaar odr uffm Klawier kã, kã ma drmid faschd alle Volxliedr beglaide. Uff dr Giddaar isch no oifachr, weil ma middam Kabbodaschdr oifach die häechre Donarda oo glei schbile kã.
Was fier a Enschdremend schbilsch nôcha du? Oo bloß Radio wie dr neidreno??

Äddid: Grießdi, Emmrle! Machs gued!

O Manne, en meim Aldr? Dâ miaßt i jâ erschdamol Note lerna.

candice,  dô wäez erkläed. Die eschde zwai Minudda raiched fier an Ibrblick.

neidreno, es gôd oo ganz one Noda, wemma bloß sein Schbass hao will. En däer Schuel, wo bei meim Kiibôed drbei isch, wäered die Ackord bloß mid Bildla erklärd, wele vo de Daschda du drucke sollsch. On middr räechde Hand kasch oo one Noda oifach ebbs drzue embrowesiere. Des häesch nô scho, was bassd ond was idd bassd.

Ennam Jugndfreizeidheim haon i amol mid Jugndliche 'kinesisch' gschbild. Des had deane wansenneg Schbass gmachd. Ma schbild bloß uff de schwaze Daschda. En dr Fachdermenollegie haißd des 'Pentatonik'. (En däer 'Tonart' send normalarweis oo d Kiecheglogga gschdemmd.) Dô bassd allad alls zemed, egal wasd schbilschd. Oir schbild lenks am Riddmes, ond dr andr schbild rächz a Melledi drzue. Bue, des isch a Gaude!! Des kasch amôl mibbm "das co-neidreno" ond mid "das neidreniddo" brobiere, liebssss neidreno!

Vielleichd brobier es amâl.

So, d Weschglemmara honne etz wiedr vom Zinka weg, d'Fiaß sin jo gwäscha hoißts- hm? schnauf - schdimmds? s'scheindso.

I ka loidr koi Inschdrumend. Mein Obba hot in d Hitlrzeid alle Familiainschrudmend vrnichdad (domols hots no a oigane Familiakabäll gea, hennse vrzelld), weilr fr dia Braune het schbiela solla, un id wella hot, wonnr doch an Roda war. Sellawäag hots fädrlicherseids niame koine Inschdrumend me gea, un midderlichrseids sinse in da Gaschdronomie aufgwaxa, do hot ma zum Musimacha koi Zeit khett.

Un i hon amol guad Goschahobl schbiela kenna, abr hon no jedsmol a Bloddara an Mund griagd un hons drum bleiba lo, un etz kannes nimme.

isch no äbbr do?

Jâ.

Gäbele, des midde Blôsa uff de Libba kommd, weils ibrdribe hasch. Wenn i zvil Klarenedd gschbild hao, zom Beischbil frienr uff de Hochzeita vo môeges om elfe bei de Brauddenz bis znachd om zwai, wenn die ledschde Denzar endle hoim sen, haon i mier efdr dLibba bludeg bisse kedd!

I bi no do; Griaßdi Moi Gab!

I hao amol Klawier ond Gidarr glernet, abr mir fehlt oo komblett d´Übung. Allat koi Zeit id.
Abr i gfrei mi, dass es Zuckarlefehl aufm Musische Ginnasiom isch; des gfallt mir obandig!

*eddid* Griaßeing, manni ond Schdiggle!

Gfellz dr Fehl oo?

Zuggrle un Manni *freu*

etz kanne schlôfa ganga - miad ware heid morga scho

Guad Nachd!

Ond i be wohl neamrds? Pffffffffff.

neidreno, iez gôsch zesch zom Klawierschbile, ond nô hoigaadebr weidr ;-))

manni - Ganz guet; s´oinzige Broblem isch des gscheerde Ladein; i ka oo id vrschdao warom des fier d´Musa Pflichd isch, ond se koi Franzesisch (odr Schbanisch odr Iddalienisch) learne derfant.

Eha, Moi Gab! Erschd gfreit se si ond nachat gohts... :-(

candice, Ladein isch doch brima. Fend i jedafalls.

Manne, om die Uhrzeit? Gwiaß net.

neidreno, heid beni ibrigns druff komma, warom du fier mi audemadesch a 'däer' bisch: Es isch des -o- henda dedda. Alle Wäedr, die wo i uff Neiladdein kenn - vino, Mario, Topolino, prosciutto - send maschgelin!

Schdiggle, irgendwia hao i mir des ietz scho denkt, dass Du des brima findsch...

Ietz gang i d´Schdiega nab in mei Bettle (scho wiedr ohnen Dengs, der isch beim Schwemma); I mueß umra ganz gottlose Zeit aufschdao - Bäh!

Schlofts mea guet!

Manne, a neidrino isch doch ned mit sodde brofane Denger zum vrgleicha. So äbbes.

candice, ond warom hâsch Dr des denggd? Ladein war halt mei zweide Fremdschbrâch ... nâch Hochdeitsch ond vor Englisch ond Griechisch (abr des bloß en ra AG) ond Franzesisch. Aldschbrachlichr Zuag em Gimnasiom halt.

Abr 's neidrinido lernt au koi Ladein en seim nadurwisseschaftlicha Zuag.

Ond i vrabschied mi jetz au. I wensch Eich alle a guade Nachd.

*scho gar nimmr da ben*

I hao oo Ladein ghett, ond Englisch, ond Franzesisch. I fends oifach id gnua wemmr bloß Englisch als oinzige "lebendige" Schbrach lernet. (Ond außrdeam war Ladein langweilig - fier mi - ond mr hett so viel lerna miaße, ond i war doch allad so faul... na, id 'faul', bloß mit wichdigere Sache bschefdigd...)

ädd vieredachzg: a neidrino isch doch ned mit sodde brofane Denger zum vrgleicha. - Schdemmd aingle! Es isch hald bloß wäeges dr Gramaddeck. Des wenigschdns sodd a Laddeinar als Endschuldigongsgrond halbwäex gelde lao, wenn em scho Assozzaziona zuu brofan ond essedäeresch send!

Boschgribbdom äddid: I hao Laddein bloß als Meneschdrand kedd, weil i no en dr vôerkonzellarische Zeid die ganz Mäeß auswendeg läena hao miesse! Ond i hao me allad gfrôged, warom des oimôl dominus, nô mea dominem ond zmôl domini haißd!
Heid fend is schad, dass i des nie en dr Schuel richdeg gläened hao. I fenz endrässand, oifach vo dr Endwicklong von ar Schbrôch zom heidege Iddalenesch ond Franzesesch.

Boschgribbdom äddid 22:45 - I schald iez d Kischde oo aus ond due no a bissle Klawierschbile midde Kobfhäerar.

Guez Nechdle!

Wenn-dr alle scho schlaufat, brauch-e au nix mea schreiba...
I wensch eich alle a guasta Nachd!

... ond wenn dr all scho mea beim Schaffe send, nô brauch i äeschd amôl oo nix mea schreibe ...
(ond mach mi mea an mei I-IV-V-I ;-))

I wensch ui all an guede Dag! Land id lugg!


Boschgribbdom ädd DuSenz: Ond snägschmôl luegesch a bissle frienr rei! Solang no ebbar auf isch. Ma sed zwar: Je schbädr däer Abänd, däschdo scheanr die Gäschde! - abr wemma scho em Bedd flacked, habba nix mea vo deir Scheahaid! Des isch nô a gladde Scheahaizvrgeidong!! Abr amend hasch du oifach zvil drvo - konndes sei?

Iatzt muane doch daudrenna zwengscht amol "Guggugg" sa, drmit i dean Fada an meine Ardiggl dren hau.

Morga werre zerschmol 's Maibaumaufschtella en meira nuia Hoimat seacha. Benne gschbannt, ob's des au so schea na griagat wia drhoim - alzo en meira alda Hoimat. An Weckruaf git's schommal ned - was i ewig schad fend - ond loidr stellats au koi Birk, sondrn an Fichta auf. Abr mei - gmolt griagt mrs id.

A Birke als Maibaum?? No nie id xäeche! Geiz des ibrhaubz? Bisch dr dô sichr? Du kennsch abr scho a Birke von ar Danne wäck??? A Maibaum isch bei eis a Danne, ond des bedeided fachsprôchlecharweis, 'es ischd eine Fichte'.
Birka geiz an Frõleichnam, abr kloine, an dr Schdrôß ond näebe de Aldäär.

Dô beni gschbannd, ob sen bei ui nôch dr dradizzenelle Mäddode aufschdelled mit 'Zanga' uss zemebondene Schdanga odr ob se ganz nuimodesch an Krã nemmed. Des isch oifachr, kizr ond sichr'r, abr hald id die aldhäebrôchd handwerkle Ard, wie ma s frienr ond scho allad gmachd had ond wie ses käed. Dô kenned die Mannsbildr zaige, dass se no a Muschglschmalz hand ond koine Waichair send. Des machd hald doch ebbs häe!

Manne, wanne di znägschtmol driff, nocht waschedrn Grind. Wer i a Birk vonara Fichta ondrscheida kenna - i?! Wo i scho alz Kend älle Bäim vo meim Vaddr beibrocht griagt han?! Selbschrvrständlich hond os Birka als Maibäim! Ond i fend des vill scheanr alz wia dia mischtige Fichta.

Dr Dengs, der was letschts Johr scho beim Maibaumaufschtella drbei war, hot gsät, daßes dau o mit Schwalba deant - wia ses ghert. Drhoim deandses au mit Schwalba.

Hiermidd erklär i offizinell mei Nichterscheine beim nägschde Dräffe uss Angschd vôer ond zuer Vrmaidong vo Selimas rabbiade Grendwäschmeddoda ãlässle vo maibaumrellewandar Birkeignoranz meinrseiz! Däffenedif!
(Allad uff die kleine Dicke ond allad mibba uff de Grend - des isch doch õfäer!!!)

Sigsches, Selima, iez drauze koir mea rei. All hanze Schiss vôer deine ägschdreme Räeckziona ond rabbiade Mäddoda! Iez hasch all vrschreckd, so wie de du auffiersch, wemma amôl a andre Moinong had wie du, odr an gscheide dennene Maibaum!

Hierrom geits au viel Birka als Maibaim.

Aber hier en dr Schdad geits koin, dô muaß mr bloß s Sach oms Haus rom wegroma on d Garaschaeifahrt zuaschließa, sonsch dont se oim s Audo mit Zahpaschda oder no schlemmere Sacha verschmiera on Zuigs forttraga. Net so arg witzich. Letschtjohr hen se d Klenke vom Gardaderle mit ra schdengicha Sauerei eigschmiert - irgend a Rasierkrem oder so ebbas. Beira Bekannda hen se a ganze Tub Ketschab uff d Dierschwelle austubt. I hoff, mr kommat drvõ desmôl.

Ja, des haon i oo gmerkd, wieni noo uffm Dôef gwohnd hao. S isch jez Jôr schlemmr wôere midde Aggrässiona. Aingle isch d Walburgesnachd ja a Häxefäschd, also mißded aignle dWeibr ond dFehla ummanand schbrenge. Drweil dond iez die jonge Buebe räechd käl! Vrkede Weld!! Frienr hanze bloß vrzoche, was id aufgraumed gwe isch, heid mached se Sache kabudd!

Sinnr id beim Moijaschdegga? Honners s'Gardadiearle feschd bunda?

Bei uns honnse alle Raddar in Blaschdig eipacked, wegawarum bloß?

Maibeim hennse au aufgschdelld, abr dia sin alle nagged, mit koinr Rinda me dra. Sins Birga? Sins Fichda?

Gäbele, was isch des - Moijaschdegga? Des kenn i oo id ;-((

Jô, des midm Boimle aufm Dach! Woma glei siehd wenda magsch.

Frianr, wo mei Hoimad no a Dorf gwäa isch, honnse no vom Haus vom Mädle zum Haus vom Bua a weiße Linije gmôlad. Jô, no henns alle gwissd.

I glaub, mir schdeggd koinr me an Moija.

S'hôt me gar heid no d'Offdamoloschisd gfrogad: Wa Sie schaffd no?

Etz woiße au wegawarum e all so fria ins Neschd muss. Des hosch du gsaid: Je schbädr däer Abänd, däschdo scheanr die Gäschde! Alle Wiaschde gen ins Neschd!
*blärr*

Pouschdschgribbdum: Mag heid noid ins Neschd!

Also sinnr doch an Moijaschdegga. Koinr me dô.

S'Dings hôt grad sei Mäggleit rausgholt, s'hot äbbs ghert.

Oiii, s'hundrde Pouschding isch meis.

I hau glei ab, d'Hexa munn heid Nachd naus. D'Beasa warded scho.

Mai Muader hôt älls verzehlt, was ihr Bruader on seine Freind amôl en dr Mainaacht dao hent: Dia hend en Sindlfenga gwohnt sällatsmôl, on dô hôt's no a baar Baura ghett. Oin vo deane hent se et leida kenna, on der hôt am Ôbad vo dr Mainaacht no an Waga mit Miischt glada. Nô hent se en dr Naacht den ganza Miischt vom Waga radao, da Waga ausananderbaut, en de Oinzldoil uff da Schubba nuffdao, droba widder zemmabaut on da Miischt en Oimer nufftra on neigfillt. Fascht de halb Naacht hen se dô dra gschafft. Mô der môrgads uffgschdanda isch, hôt r seine Aoga net draut: isch dr voole Miischtwaga uffm Schubbadach droba gschdanda! Desch nia rauskomma, wer des dao hôt...

Gäbele - vom Haus vom Mädle zum Haus vom Bua a weiße Linije gmôlad.
Wenns id so weid wär, däd i doch gladd mid a bar Kibl vol weiße Farb komme :-))


I be scho no dao, i hao bloß grad a bissle oisvierfemfoiseled. Iez häer i abr auf fier heid, weil mr die lenk Hand scho wäe dued, ond a Seneschaideenzendong brauchz id!

Emmrle, mid deam Mischdwage hanze abr ganz schea schufde miesse!

Ohh Manni, du bisch schee, isch liebbe disch!!!

Emmrle, deschmr fei a guade Gschichd!! Des Xichd hette säa wella!

Gäbele, ibrigens isch dei schwäbesche Rächdschreibong scho faschd vôerbildle: Xicht! A ganz a hervorragnde Fonem-Grafem-Zueôednong!! Isch libœ dischschsch :-))

Dankschee Herr Läarar.

I glaub, mr sin alloi. Oi, desch gfährlich.

Wäer sich id en Gefar begibd, kommd dren omm!! ;-))

@ achdeneizg: wegawarum e all so fria ins Neschd muss.

Seddene Bemerkonga falled ibrigens oo ondr das vom Fadenereffnar am 20 Apr 09 23:29 ausgschbrochene Vrbod vo Massechismes! Merk dr des!

okeh, okeh, i gang scho on lass uich zwoa no a weng Siaßholz raschbla en drauder Zwoisamkeit.
Guat Naacht zamma!

Was hasch iez duuu gex an flodde Dreiar, Emmrle! Des wär ja ganz ebbs nuis ;-))
Mei Nommr hondrdsibe gild oo fier di!

Also manni!!!!!!!!!!!! I wur jô glei ganz raot! On i gang jetz.

Ganz raot?? So gschameg kennedi gar id, äerlich!
(Kennedy? Hmm? War dô id ebbs middr Mäerelin? Oo a Dreiar middr Schackelin??)


Hee, id so schnell, Gäbele ond Emmrle! I will doch midd ;-((

Jô griaß Gott Edid, bisch au dô. Hosch gradm Manni gholfa?

I bin schonno do, abr faschd scho fudd.

S'Mäerilin, des war doch midm Dschonn unnem Bobb (d'Dreir, abr s'isch id guad ausganga).

Schamä dö sã droa, ollalla

Faschd fudd? Was nemmsch nô heid fier a Buech mid? Odr gôz Eischlôfe amôle ohne Läese, wennd so schbäd drã bisch?

Ja, d Ädidd hilfbr efdr, wenn i d Nommra schbare will, dass dr Fade id so schnell gar isch ;-))

I lies grad amma Buach ommanand. Sgfalldmr id so rächd. S'isch vom Oakley Hall un hoißt Ambrose Bierce and the Death of Kings. Wahrscheinlich liegsd do dra, dasse id dra hon bleiba kenna.

Wenne au schbäd dra bin, leasa duene wellawäag. S'Leasa isch mei Betthupfrl.

Nacht Manni, schlôf schee :-)

*reiblotz*

Isch no äbbr dâ?

Scho!
Wo kusch nô du häe so schbäd - vom Schbord? Odr vo dr Musegbrob?? ;-))

I komm vom Wase.

Isch des so ebbs wies Frielengsfäschd uff dr Teresienwies z Menka, dass die Schauschdellar oo em Frieleng a Gschäfd mached? I kenn bloß "Aufm Wase grased dHase!" Was fier Hase send des? Die midde Schdecklschue?

I hao grad em Endrnedd glueged, wenn a Ässbã uff Wolfrazhause gôd. I will zue Schdoibars Ädi zom Frieschdicke, wel d Eindschi koin Bock mea uffn hadd! Ond nôcha far i mibbm Rad d Isar raa hoi! S eschd Môl huir so a lange Dur - semnefuchzg Killemäddr.

Dr Wase isch dr Cannstatter Wase: http://de.wikipedia.org/wiki/Cannstatter_Wasen

Em zwoide Satz schdâht alles wichdige.

Em zwoide Absatz schdâht dann Bledsenn, 's gibt koin "Stadtteil Wasen", des isch alles em Schdadddeil Bad Cannstatt.

Ond di Hase uffm Wase wared scho en Cannstatt. Ond des beziagt sich scho uff richdige Häsle. Em Link fendsch 's ganze Liadle. Dâmals war dr Wase no a Wies.

Grad so wies Menknar Frielengsfäschd - des isch äer a Näebefäschd. S bekannd ond s gräeßr isch s Ockdobrfäschd.
Bisch mid Freind odr mid Konde deddgwese?

Des middr Wiese isch oo genau so! Frienr a Wiese - heid ische bäddonierd ond kiesed! Abr schea fierd Wendsörfar uff ihre ombaude Breddr! Wenn grad koi Fäschd isch!

Wedr noch, abbr 's war scho berufsbedingt. Manchmâl muaß mr hald zu beschdemmde Verâschdaldonge ond beschdemmde Vroinigonge, damit d' Leit oin kennalernet, bezijongsweis damit se sich an oin erennret. 's isch ned emmr luschdig, abr heit war's eigedlich ganz nett.

Nô gôz ja noo, wennd s Ãgneam mibbm Nidzliche hasch vrbende kenne!

I hao grad die Foddo en wikipädia aglueged. Dô isch ja oo ganz viel bäddeniert: Des isch woll ibral s Gleiche. Bloß dass uffm Wase doch mäer Beim geid als uff dr Wiesn. S wäed õgfäer gleich grôeß sei!

Was isch aingdle s dibbische Gedrenk bei ui - Wei odr Bier? Ond wievil hasch drenke miesse?

's werd scho viiiiiiel meh Bier drongga als Wei. I woiß gar ned, ob's en dene grouße Bierzelt iebrhaupt en Wei gibt. Ond wenn, werd's koi richdig guadr sei. I hao zwoi Hefeweize drongga. Bei Eich hoißt des ned Hefeweize sondern Weißbier.

Bei eis seb ba scho oo Hefeweize, wenns id gfildred isch.

neidreno, i gang iez oo ens Bedd, weil i môere a bissle frienr raus will zom Radle! A guede Nachd ond an scheane Feierdag fier ui neidrale all middand! ;-))

Du wohnsch doch en dr bairische Haubdschdadd, odr? I hao emmr gmoint, dort däd mr Weißbier zomma Hefeweize sage ond Weizebier zu dem, wo mr dâhanna Grischdallweize drzua saget.

Edith: Guad Nacht Manne.

Zu deam Weißbier odr Weizebier kenn i koi eihaidliche Derminollegie. Abr vileicht geiz a baar ganz Schdilächde, die wo dô feine Ondrschid mached ond a Weldãschauong! Die essed oo koi Weißwuschd id - femf Minudda nôch zwelfe ;-))
Ond drenked koin Kabbedschino id am Nameddag!
Fier die wär des a doddala Schdilbruch - õgfär s Gleiche wie a Borsche middam Fuxschwanz!!

Isch eigedlich jâ au egal, Haubdsach, i griag emmr des, wa ne will.

Ond jetz gang i au. Guad Nacht!

Was isch, Schdiggle? Bisch heit no net uff? Des isch jô reglrecht schbät fir deine bräsenile Verheldnisse!

'S Gaardaderle hen se ausghengt ond nõgschmissa, aber sonsch isch glaub älles en Ordnong. Dussa gwea bene no et, weil e nemlich no em Naachthemmad be. Jetz richt e aber a Friahschdigg nõ

I be scho lang wach, seit omma viardl nâch sechse.

Abr dâhanna hett i jâ bloß Selbschdgschbräch fiehra kenna, ond des brengds uff Dauer net so.

Guada Morga dauhanna! Ond? Isch no ällz dau? Bei os handz haind nacht lei an reachta Lärm gmacht.

Manne, ond wanne a ganz a milds Schampu nemma däd? Deffdedr nocht da Koopf wascha?

Guada Morga Selima. Bei ohs dâhanna isch Gott sei Dank nix los, dronda em Ord drenna (i moi, beo ohs em Schdadddeil) wahrscheintz scho mäa, abr beo ohs en dr Schdrââß isch ruig. Zmindeschd hao i no nix anders gmergt. Mâl gugge, ob die Mülltonne no dâ send.

Ond was handr haind vor?

I gfrai me scho aufs Maibaumaufstella ond auf des Konzertle haind aubnd.

Bei ohs gibt's koin Maiboom. Mir fahret nâch Diebenga zomma Friehschobba omma elfe, halbrzwelfe. Deswäga muaß i jetz au mâl onder d'Dusch hopfa.

Selima, id bloß s Schambu sodd mild sei, sondrn oo dei Schdimmong, dass br id mid deine Kralla de Schkalb rareischd! I machs amôl vo deim Blick abhengig - muesch mi snägschd Môl die ganz Zeid räechd mild ãluege, nô rebmr weidr!

Beim Maibaumaufschdelle - es isch, wie ses käed, a Danne gwe, no drzue a räechd a lange - isch vôer a baar Jôr ennam Dôef bei Menke amôl a ganz a dragescha Õfall bassierd. Se send mibbm Wage om a Kurfe gfare ond däe lang Baum had a bissle an ar Hauswand gschdriffe, bloß a klois bissle, hand se denkd. Abr wie die Hauswand aus gwe isch, isch d Baumschbidz uff de andr Seide nomm gschnelled ond had an Mã drschlage. Also gang id zne nã, Selima. Wäe däbr sonschd meine Schubba rakredze?

I radle iez zom Ädi zom Frieschdicke, wien i zwanzg Minudda nôch Middrnachd scho gschribe hao.

I wensch ui all middand an scheane Dag!

Bis heid zÔbed nôcha!


d Ädidd moind no zom neidreno: Huir ischs oisasibzgesch Frielengsfäschd uffm Wase ond s femfeviezgesch Frielengsfäschd uff dr Wiesn. Dô isch warscheinz a Endwicklongshelfar vo Schdueged uff Menke komme ond haddem Schdaddrad vrklickred, dass dr Schdadd die Einama uss de Schdandgebiera oo ganz gued däded.

Baß bloß auf, Stiggle, ondr dr Dusche sottma ned hupfa. Mi hot's earscht em Bad nagschlaa. Des isch nix :-) Vill Spaß zDiebenga

Manne, Dir o vill Spaß beim friahschoppa. Bei eis isch dr Maibaum scho seitara halba Stond andr richtiga Schtell. Ond zAufstella guggemr aus sichrar Empfernung a.

An scheana Dag älle!

Des wensch i Euch au.

Guete Morge! S´Gardedierle isch beim Nachbar, a baar Blummakeschde uffm Baumhaus ond a Garddaschduhl em Apflbaum, abr sonschd gohds. Ledschd Jahr hammr a ganze Wuch nach eisra Mülltonne gsuechd, des war mindr. I bi froah, dass dr candibua des Jahr id ganga isch (d´Schweschter war beirer Freindin, mir waret eigloda, ond er hod si gfreid dassr alloinigs hat Fußball schaua derfa), mr woiß nia was denne Buaba so alls eifällt.

An scheana erschde Mai wenschi i uib, beim Friehschdicke, Friaehschobbe, Maibaumaufschdelle odr soscht wo.

Onsere Gardadierla hemmer widder eighenkt, sonsch war nix.
I han heit "Tag der Arbeit". I wedd abber au ährlicherweis net õbedingt heit zom Wandra gao, dô dappsch dr jô gegaseidich uff de Fiaß rom!

Selima, hälsch ons uffm Laufenda mit uierm Maiboom?

D'Biertisch standand scho - iatzt muane mal afanga me sell awengale herzomrichta ...

Abbroboo häerichde: Hasch a Deandl? Ausgschnidde däffs scho sei am Leible, wenn s no eng isch; ond dr Rock lang, mendeschdens abr ibrs Knie! Id so wie bei deane schdil- ond gschmacklose jonge Gens, wo a grad ibrs Fidle raichd!

Sodala! Dr Boom schtodt! Guad handzes gmacht, d'Buaba! Ogfähr a halba Schtond hotz braucht, bissn am Kirchberg naufgwuchtet ghett hond. D'Musik hot gschbielt ond a gscheida Brotzeit hots gea (mit Wurschtsalat benne gschleckat - abr dear hot gschmeckt!) ond a nedda Ondrhaltung mit de Nauchbra hammr ghett (o nedde Leidla). Hernocht hondsn no glei vrscheigrat ond oinr em Dorf hot iatzt scho gnua Brennholz fr da Wendr - bis en Novembr, wannr abaut weard - ischr au guad durchdricknat.

Manne! Iatzt muane de doch scho mear iebr mein Brillarand fixiera. Kâschdr mi (!) enam Dirndl vorschtella? Ganz em Ernscht - kaschdr deeees vorschtella??? I hau deane vom Musikvrei dauhanna scho gsät, daßne geara mitschbiela däd, wenne koi Dirndl aziacha muaß. Abr loidr - deane isch ds Dirndl liabrsch alz wia a Tenorsaxophon. Sell schuld :-)

Also seltsame Maibaumbreich habts ihr dô. De Baum im Herbscht wieda abbaue, so ebbes.

Vorschtella kann i mir viel, Selima. :-)

ja mei, andre Velkr, andre Sitta! Bei eis weard dr Boom em Soomr scho mear abaut. Isch ja au a Birk.

Blauhemmale, hosch reacht! Vorschtella kamr se vill. Abr realischtisch isch des ned, se mi em Dirndl vorschtella ;-) Dau ziache eanrs no a Hirschleadrna â!

So. Iatzt machmr Fajitas ond hernocht gatz aufs Konzertle.

Pfiagottle!

Ja des mit dera Birk verstau e au net so ganz. Kasch do net amol a Foddo macha?

Mei Selima, des kani mier säer woll vôerschdelle, dass du gued aussäeche dädesch en am Deandl, ächd wôr. Des wär a richdex feis Feschddaxgwand fier di. Wie scho xed: basse muesses hald! S Leible mueß eng sei ond dr Rock lang ond weid. I schdell mr vôer, dass du ois mid am bodelange Rock brauchschd, wo onda die weiße Schbidza rauslueged ond scheane Schnalleschue. Ond uss am noble Schdoff hald. Lueg hald a baar Bildr vo dr Maria Deresia odr dr Madamm Bombadur ã

I kenn des ja vo mier oo, i hao als jonga Kerle allad ebbs gege die Drachdlar kedd. I hao me allad schenierd, wemmr en dr Musegkabelle mid dr nuie Drachd neima nãgfare send. Abr dô isch hald wie a Oneform gwe, dreißg Kerle all gleich. Schbädr haon i nô a Läedrhose brauchd, weil i beim Schdudiom en ar bairische Volxmuseggrubbe gschbild hao - zue femfd semmr gwe ond endrnazenal uff grôeße Iwenz. Dô haon i mier nô egschdra a Läedrhose schneidre lao, dassse o richdeg basst had. Des isch fei schea - ond a guez Maddrial mueß hald sei. Des Läedr isch vo am jonge Elch, õglaublech waich ond schmuseg!

Wenn des Häs bassd, schaud des wondrschea aus. Ond es geid doch nix Femmeninrs als a Deandl. Dass dier des id schdao däd, isch bloß a Vôerschdellong en deim Hiere. Die Vôerschdellong kãsch gradsogued oo wäcklao! Middr Realledäd had die soweso nix zom doa!

I be scho mid amäerekanesche ond auschdralesche Fehla uffs Ockdobrfäschd gange, won i vôerhäe glached hao, weil se vrzelld hand, dass se a Deandl ãnemmed. S isch oo a Schwaaze drbeigwe. Ond nôcha send se wansenneg schea dren gwe! Ond des idd bloß wäeges em Dekolldee ;-)

D Ädidd ladd dr no ausrichde: An scheane Ôbed heid zôbed, vo mir aus oo in de Dschiins ;-)
ond
@ 143 - ledschda Sadz: Ja, du bisch sell schuld!
Dass de du an sedde Eißrlechkaide feschklammreschd, zzz!

All no de Rausch ausschlôfe, odr was isch los???

Nix Rausch ausschlofe, manni, d´Lährer miasset halt allat arbeite.
Grad hat mr mei Fehl a Indrnedseide zoigt, die ihr obandig gfellt (mir oo) - wemmr scho vo dr Museg gschwätzt hant:

http://www.youtube.com/watch?v=SG6Ef-NQCi4

Os hammr au koin Rausch ned ausschlofa miaßa. Danzd hammr wia dr Lomp am Stecka! Schea ischs gwest! Ond iatzt kommr scho vom Einkaufswahnsinn.

Soddane Aißrlichkaita send fr mi essenziell - wann i me en meim Häs ned guad fial, nocht isch älles an altr Kuahscheiß. Ob mir des schtat odr ned, isch mir oigndle wurscht. Des mage neamads adoa, wallne oausstehlich werr, wannses miserablig afiahlt. Des hanne scho alz Kend ghett. I ben oifach a Hosamensch. Ganz selta ziache oins von meine Gloidr a - abr des send ganz Bsondre, dia i au bloß an ganz bsondre Däg adoa. Ond abgseacha daudrvo benne scho aus Brinzip gega dia Dirndl, wall dia ned schwäbisch send, sondrn boirisch. I hau a Gloid vo meira Uroma, des mr baßt, und a paar Reginahauba und scheane Schürzla - wann iebrhaupts Dracht, nocht dia. Gwiaß koi boirischs Bluamakaschtadirndl. Des sottn dia vo Mieschbach aziacha.

Manne, Rausch ausschläfa? Awa, i hao heit friah scho Wesxh gwäscha, war beim Ikea und dann no en dr Schdadd eikuafa. Ond jetz miaße mr zor Schwiagrmuadr, Mebl zsammabaua.

Selima, laidr giht's hald koi so dibbische oiheitliche schwäbische Dracht. Dia Norddeitsche, die wo sowieso Schwarzwald, Bade, Wirddaberg, Schwâba ned ausanenderhalde kenned ond au ned wisset, wo die Grenza zwische Boira, Schwâba ond Wirddebergr vrlaufed, bezijongsweis, enwiaweit sich des iebrschneidet, denggat dâ moischtens an die Bollahiat vo Gutach, Kirnbach ond Hornberg.

On weol's koi so a dibbische Dracht gibt hât mr frieher uff em Wase gar koine Drachte xäa, abbr en de ledschde fempf Jâhr oddr so sieht mr ' wiedr vrmehrt, abbr hald Dirndl on Krachlederne.

Candice, des Fideo isch schee, abbr hâsch au xäa, wie die vier Kärle de Bolero schbielet? http://www.youtube.com/watch?v=H5MLNMgpywk&NR=1

Selima, hasch räechd wäege dr manglnde Schdilreinhaid vo dr Drachd. Des isch oo bloß so a Schbinnarei vom Brenzrägende Luibold gwe. Dô doch liebr die Weschdamäerekanesche Goldgräbarräerlesniedahosa vom Leb Schdrauß ussm obrfrenkesche Regnitzdal em Langkrais Bambäeg. Isch ja id so weid wäck vo dô wo du häekusch ;-))

Dass du wäeges so ebbs uffs Saxefõschbile vrzichdesch, isch eweg schad, dô kasch iez sage was dwidd!! Sell schuld!

Ist es, ist es, solkar! Hallelujah!!! :-)

*kicher* Ein Teilchen in dicken selbstgestrickten Wollsocken und Birkenstocksandalen beim SchwiMuTeilchen Ikearegale aufbauend ;-)

Edit!

Na, Proscht Mahlzeit - des hot ja wondrbar fonktioniert. I gang amol ebbs zom Essakocha. Pfiagott.

Griaß Gott mitanand!

Zuggerle, desch fei an scheena Lingk, mittara scheena Musi, uns kommt gar da Manni drin vor.

Also bei uns hot au s'Gardadiarle gefählt, gfunda hemmers niana, abr des ka sei, wellmr gar nia kois khett hon :-)

Hei, ihr Minkner, honner gsea, dassde ledsch Woch an Zeppelin in eierm Himml rumgfloga isch? (I sag gfloga, well alls wa in d Lufd isch, fr mi fliagd). Der isch vom See komma, un gfloga hottn mein Neffe. *bruschdschwellvorschdolz*

Z Essa isch vrschoba, wall dr Dengs no a wengale schaffa mecht.

Moi Gab, haue mr doch glei denkt, daß mr der Zeppelin irgndwia bekannt vorkomma isch- Em Milchhaisle benne gwest :-)

Selimale, schee dassde dô bisch. Mir hon scho gessa. Heit morga hots Dings butzed un i hon Wesch biegld, vom Zehne bis am Drei un no hommer Lasagne gmachd un an Gellariabasalad un an Aggrsalad dzua gessa un an Bordoo gschlierfd.

Bei ons gibt's glei en Schbargl.

Ond Selima, i hao koine Wollsogga, ond Birgaschdoggs hao i bloß als Hausschuah â. Ond außrdem war i jâ net uff em Wase.

Wollsogga an der Fiaß sin fei was schees, wenn beißig kald isch, faschd so schmuseg wianam Manni sei Leadrhosa am Fiedla. Biargaschdoggs dhoim hot bloß mei Dings a, i renn liabr barfuaß rum.

Aufm Wasa? Hot mr dau Sogga ondr de Sandala?

Moi Gab, ui! Du bisch o so barfiaßiga? I o :-)

So. Ond iatzt fange z Kocha a (Rindrhüftsteaks mit Gorgonzola iebrbacha mit Salaut ond ... ond Pilzla glaube honne kofft). Pfiagottle erscht amol!

Etz gange abr ins Egg, idmôl Schwäbisch kanne richtgi schreiba.

An Guata, Selima un alle dia mitässa diarfad bei demm Fäschdässa! (Jô, barfuaß megads meine Fiaß am Liabschda)

Etz gange abr ins Egg, idmôl Schwäbisch kanne richtgi schreiba.

An Guata, Selima un alle dia mitässa diarfad bei demm Fäschdässa! (Jô, barfuaß megads meine Fiaß am Liabschda)

d Leo schbinnt, i hon wedr an zschweara no an zdigga Fingr

Iez beni grad zwai Schdond dschbäd drã fier uiren Hoĩgaade. Vileichd kudd ja mea ebbar vorbei vo ui.

I be oo a Barfießlar, abr Biekeschdock hauon i oo, des haißd Nôchbaude, s isch koi Orginal - gild des oo? I haos abr faschd nie ã

Mei lenge Klawierhand wäed allad bessr, grad haoni Schdillenachd usswendeg drzuegschbield ond Gutenabendguenachd, ond Little Brown Jug gôd oo allad bessr.

Uffm Kiibôed isch des a Gschbass, dô ka ma vrschiedene Kleng eischdelle. Lenx haon i d Kiecheôergl ond rächds s Wibrafon. Bue, deschdr a abarde Mischong!

I kâ Wollsogga ned ab. Des kribbelt ond juggt. I kâ iebrhaubbt koi gschdriggde Wolle uff dr naggda Haud vrdraga.

Ond ja, Selima, mr kâ au ab ond zua Leit mit Wollsogga en Birggeschdogg-Sandale en dr Effendlichkait säa.

He, Gäbele, dean Zäbrleng haon i scho die ganz Wuche xäeche. Süddeutsche Zeitung schdôd druff. Räechd schea siechd a aus. I hao mr zeschd ibrlegd, ob des woll a ächde Zäbrleng isch odr bloss a Blimp. Abr a siechd so ellegand aus, so schlank, ond had de Moddoor henda denna, dass es koi Blimp id sei kã.

Hasch oo scho amôl midfliege däffe? I schdell mr des herrlech vôer, so riebeg dur d Lufd schwäebe!

neidreno, middr Woll uff dr nackade Haud gôz mr so wie dier. Bloß an de Fieß machz br nix, dô haon is gäere. Mei Käsfabrick max schea warm!

An dr Fußsohl dät's au ganga, abr ned am Knechl, dâ fangts zom Jugga â.

Manni, der Zäbrleng war scho in Siedafrika, in Jabban, ibr Köln, Prag, un woiß it wo alls no. Mitfliage hotr mr bis etz all bloß vrschbrocha. Abr i muaß zr Endschuldiung au saga, dasse ni koi Zeit khett honn, wenn's denn bassd het. S'isch id so oifach, dô brivad naizkomma, un sonsch isches hald au deir.

Schdiggle, dia heidige Wollsogga juggad nimme. D'Wolla hôt au evoluierd!

Gäbele, isch die juckfrei Woll vo deane Schôf, deane wo se oo s Ibrezaojucke wäckzichded hand?

Ädidd: Des däbe iez endrässiere, ob dier oo ibre Zao jucked, odr ob dier schbrenge odr hubfe miessed ...

Moi Gab, i fiehl me en Baumwollsogga wohl, i brobbier des mit dene Wollsogga erschd gar nemme aus.

jugga, schbringa, hipfa - hobsa, hosch vrgessa! Manni

Schdiggle, d'Schesä schdriggd Sogga, dia juggad, schbringad, hipfad un hobsad id. Dia schdriggdse abr blooß fr sottene wo se mag.

Manni, ob des dransschenigge Schäfla sin?

hobsala ;-))

Hobsala isch in Schweda :-)

Also was ihr alles an de Fiaß het, odr o net.

Hemele, was hasch nô du an de Fieß? Hemlblaue Blaschdickschdrembf? ;-))

Manne, i be au scho die ganz Zeit am Iebrlega was d Moi Gab mit "dransschenigge" moid.

Isch des amend nidralemannesche Bodesäeideomadeck?

Also mi däts ohne Schdremf die moischt Zeit an de Fiaß friera. I han em Wender selbergschdrickte Schdremf, on die juggat iieberhaupt edda. Wiaviel Jôhr ischn des her, Schdiggle, dass da zletscht môl Wollsogga abrobiert hôsch? I moi au, dass di moderne Woll et so juggd wia friher. Abber et dass d' moisch i well de missjoniera - du kãsch 's halda wia de witt mit de Sogga!

Zo meim Geburtsdag (bschd, desch a Iberaschong) griag i richdige Holzschuah - dia han-e kirzlich môl emma Holzlada gseha, mo-n-e a bsondere Latt kauft hao. Dia sen aus Holz mitma saubegwema Fuaßbett, on mit ma Kuahfell als Obermadreal. Dô frei e me richdich druff.

Miaße mr halt warda, bis d' Moi Gab ons uffklärt. Abr fir heit vrabschied i mi ond wensch a guade Naacht.

Edith: Goldammr, scho a bar Dag, i glaub, i be no en d'Schual ganga ...

Abr jetz be i weg.

Emmrle, ond was fier a Sole hand die? Middaar Holzsole rudschd fei leichd aus ond laud wäre se oo: So richdege Klapprar hald! Odr wie d Hollendar saged: Klox!

Freili, manni, abr net blau, des woisch abr, odr? Mir ham uns ja scho a baarmol droffa und sag jetz net, du hätsch des net gmerkt.

Äerle xed, Hemele, uff Zocka haon i dier no nie id glueged kedd! Des wäer i nô snägschmôl nãchholle. Also vrschrick id, wenn i dier de Hosesaum nauflubf!

Abbroboo Holzschue: Kennedr ui an dean scheane iddalenische Film " Der Holzschuhbaum " erennre? *Jessesiezischdesjaooschomeadreißgjôrhäeiglobikäerzuedealde*

noe, noe, dia hent onna no so an Gommi drã oder so ebbas. Dia laufat zemlich leis.

An Gommi egschdra fier dSchue gosse odr ussam aagfarene Laschdwageraife rausgschnidde, odr uss oim vo deane uldrahibbrmoderne Leichdondlaislaufraife?

Des woiß i jetz au ed so gnau. Frôg me noml nôch meim Geburzdag, velleicht ka-n-e 's seha, wenn e se ãhao. Älles so ekologische Handarbeit eddafall. Wen glaube in Eschdreich wo gmachat, dia Denger

Eschdreich? Nô hanze vileichd a Wendrbrofil druff, M&S, amend mid Schbaix??

Boschgribbdom: M&S haißd Madsch ond Schnäe, ond id Masosado, gell!!

dransschenig = transgénique = genetisch vränderad

Dschuldigung, hon den Aksã ägü vrgässa khett, nô heddadr id rota miassa.

Schlôfad guad iar Soggadrägr odr au id Soggadrägr.

I muaß endlich mei Buach ausleasa, snägschd warded schô.

Noi, koine Schbaix, des wedde nôch doch edda. :-D

Ôch schad, jetz hau-n-e deekt, i hett velleicht Masosado-Gommisohla! Des wär doch ächt was Schiggs!

"dransschenig" - des isch ja scho dSchenialidäd ibrschraidnd - wao!

dransschenig = transgénique = genetisch vränderad

Dschuldigung, hon den Aksã ägü vrgässa khett, nô heddadr id rota miassa.

Schlôfad guad iar Soggadrägr odr au id Soggadrägr.

I muaß endlich mei Buach ausleasa, snägschd warded schô.W

Au Boschdschribdum: Wendrbrofil, hôt des äbbs mit Wônderbra zum dua?

Das mid de Masosado-Gommisohla isch wie mibbm Bäddõ: Äs kommd darauf an, wass mann damidd machd!!
Wemmr eis dräeffed, lass's liebr dahoi!!

Ha wa, dô isch jô a reglreachts Edith-Kuddlmuddl. I han au nô was edediera wella, abber ihr hent scho älls vrschdopft ghett! Nô lass-e-s halt.

I gang jetz au ens Bettle mim Buach. Road from Coorain. Echt schee.

editversuach
ach manni, was ischn a Bäddõ, bidde?

Beim Wendrbrofil kudz wie beim Wondrbra uffs Brofil ã, wie dr Name scho sed. Bloss hald oo em Sommr!

Ädidd: An Bäddõ machba uss Zemend ond Kis ond Wassr: Kennschd dean Werbeschbruch idd?

Emmerle, sin wenigschdns Rädla dra?

So Klappr han i au amol ghet, mit Gummisohla ond Ledr oba driba. Dia waret abr net aus Holz, also koim gwaxena, sondern des war so a holzartigs Plaschtik. Warn ganz praktisch em Garda.

ganz praktisch em Garda. - Genau! Ond em Wendr mit Schbaix!

sin wenigschdns Rädla dra? - Des glob i id, abr se wared frienr   an   Rädla drã!! dMichelin send ibrigens die deireschde, abr die beschde.

ach soo, Beddõ, dät i dô saga.

I hao hald mid Bäddõ de Ondrschied zue Bedd klar mache welle. Dass jeda glei waiß, woni iez nãgang ;-))

Guez Nechdle!

Mit Schbaix wäred se vielleicht doch fir Sadomaso-Gschichde geignet.

En Guade Morge wensch i allerseitz.

Guata Morga mitanand, ihau grand nauchgläasa, i lach emmer nôo...

Pfilleicht isch's guat, dassd'ons it so arg viel Leit vrschdandat, sonscht hoißt's am End:

Sadomaso auf schwäbisch isch, wenn oiner mit de Kuahfellclogs ômanandlauft...

*mitlachadua* Faschafempfrle, i fend au, daß des dauhanna a herrlich surrealistischs Geratsche isch :-)

Gescht isch dauhanna fascht dWelt ondrganga. Ghaglat hatz ond gwittrt ond da Reaga hatz raghaut - de Baura weards gfreia.

I gang a mal a wengale naus, a paar Bflanza omdopfa.

Guade Môege allmiddand!

Wenn dr Rächnar sei wechndlichs Bäckabb gmachd had, des wäed so en ar halbe Schdond so weid sei, gang i uff a Radltur. Heid far i uff d Finsingar Alm!! Des wäered so õgfär femfeviezg Killemäddr. Des klengd wansenneg nôch Bäeg, abr die oizeg Schdeigong send die zeje Mäddr uff de Schdaudamm vom Schbaicharsäe nauf. Dr Reschd leid doddaal en dr nordeschdlene Schoddrebene vo Menke! Es geid a guede Wiedschafd dô ond d Bedenonga hand scheane Deandl mid saubre Drenkgeldblusa ã. Wenn scho Zelima koi Deandl id ãnemmd, wemmr eis em "Milchhäusl" 48° 08' 59,76" N - 11° 35' 06,44" E dräefed, nô wenigschdns des! Dô gfrai i mi scho druff. Scheane Aussichda also uff jedn Fall, ond s Weddr isch oo fandaschdesch - koi Welkle am Himl!

Ädidd ois:Ond bei eis haz bloß a klois Wäedr kedd, a bissle dàured ond blidzd haz scho, abr s had id amôl räechd greanged, bloss drebfled! I be beim Radle gwe ond hao id amôl de Annerack ãnemme mieße.

Ädidd zwai: DuSenz, wennd widd, konnde br eis doch amôl zom Radle dräefe - schdadds mea beim Reide uffm Donaureidwäeg beim Klôaschdr Weldeburg! Hedsch Luschd ond dädschde draue mid mier? Kasch de ja beir Selima zäeschd ibr mein Leimond beim Omgang midde Fehla emformiere ;-)
[Selima, du waisch scho, was i iez vo dier vrwade! Red koin Scheiß, gell!! Alls muesch ja id vrzelle :-)) ]

Bei ohs hâts bloß a baar kloine Schuggr Räga gäa ond omma sieben rom hât's a wengale vo Weschda her vom Hemml ra grummelt, abr sonsch isch dâhanna nix gwäa.

Ond wa isch dâhanna sirrealischdisch? Des sen doch alles sähr realischdische Sache, iebr die wo mir schwätze deant. Ond Glox mit Schbaix kenne scho fei a sadomasechischdischs Wergzeig sei. Wia dr Manne so sche zidiert hâtt: Äs kommd darauf an, wass mann damidd machd!!

Des isch vrmutlich ein Leitsatz der Allgair Philosophie: 's kommt äbbl drauf a, wasmr drmid machd! Mr ka a Dort essa odr, wammr grad narrat isch, deam, zwengs deam mr narrat isch, end Wisasch drugga :-))

Manne, ganz gwieß woiße, was Du vo mir vrwartesch. Abr Du waisch ja, daß a Schwauba genettisch bedingt ein saumäßig aufrichtigr Mentsch isch. Ond laidr siacht mr mir ällz a.

*ganzschnellundliisiligdureschnei*

Troz de Skorpion, Wölf, Lüchs und wilde Hünd, de Schlange und Giftspinne und em hisige Autofahrstil, leb ich no und es gaht mir guet und ich han beschlosse, Eu das mitzteile und Eu en schöne Summer z wünsche; de isch da nämli scho acho.

Jetz guggat au dô nã! 's Fleckle schneit duure! Desch amôl schee!

Schee, dass em Fleckle guat geht.

Fleckle! Au wenns scho mea fut isch - schee, dassmr was ghert hant.

Manne, heit bi i beim Radle durch Texas gschdrambled, des kennsch gwieß oo ...

❄ sSchdreckise hasch hoffndle dahoi glao, dass die dô en deam Schkorbionland oo räechde Ooge mached, wenn se deine scheane lange gschnägglede Hôr säeched :-))

candice, an Texas in däer Gegnd kã i mi id erennre. Bloß ganz donkl demmred mr: Dô isch doch ebbs gwese - abr waas???

Schdadd Texas kohsch oo 'Kippach-Moos' sage, ond do kommsch vorbei wennsch vo Roriad nach Balteratsriad so a bissle querfeldei fahrsch...

http://web2.cylex.de/stadtplan/marktoberdorf-...

ond do isch oo ganz wundrschea!

Grad wo mei Dings un i hon radla wella, hots Telefon gschällad un unsr Dochdr hot gsaid miar kommed etz, radle kennatr eh id, wells Wäddr umschleidt, un scho hots agfanga zrengla. Abr i frei me, dass wenigschdns ihr hon ralda kenna, in dem wundrscheena Ländle des unsrs isch.

Un i frei me au, dasses Fleckle durregsurred isch un Szenzle un Häwann sou blu au môl wiedr do wared, vn alle andre ganz zu schweiga.

Etz hot doch grad unsr Schdanduara bimmld, hon gar id gwisst, dasses scho so schbäd isch.

Schlofad guad, alle mitanand (ha, id grad alle mitanand, des wär id aschdendig)

Fr jedn Gschmagg:

http://www.youtube.com/watch?gl=FR&hl=fr&v=gL...

http://www.youtube.com/watch?gl=FR&hl=fr&v=Se...

Gäbele - Vo wäege Fr jedn Gschmagg:-(((
Du gib fei obachd, gell! Zue eisrem Dräeffe breng i meine Subbrklox uss deam ägschdraschwäere Buxbaumholz midd (schbäzzifischs Gwichd: oiskommavier!! Die send so schwäer, dasse id schwemmed!!), dô kasch nô dei blaus Wondr vrläebe! Ob mid odr one Bra kasch dr raussueche, wod die blaue Fläek widd!!

Abbroboo des wär id aschdendig - Dô hasch dr abr scho sell uff d Libbe beiße miesse, dass dr koi Lachar odr gar a Juchzar auskomme isch! Bizzle däz di scho, gell? Gibs zue!!

Haz iez ui all d Schbrôch vrschlage, id bloss em Gäbele, was i ja no vrschdao kudd? Dass koir d Ausred id hadd, a häb de Schbagaad id gfonde kedd, lubfn mea uff de äeschd Seidde: Klick - ond scho isch bassierd :-)

                        KOS - Klick ond schubs!

Griaß Gott.

Isch iebrhaubd äbbr dâ?

Griaßdi manni!
Mondag isch halt oifach a bleder Dag fier LEO.

*zruck and Arbeit gang*

*eddid* ... ond Schdiggle! :-)

An ganze Dag koi Pouschd ond dann sinkro - wenn mir id auf oinar Wellelänge sind, Schdiggle, dann woiß i oo it. ;o)

I bin scho dô, lomme etz bloß it hogga!

Nô vrdail i amôl die läoibliche Sinkronbonkt:-)
            Fier di, neidreno: ⚫
            ond fier di, Zickarle: ⚫

Mir uff oinra Wällaläng? Hmmmm, i woiß net, i war dâmâls froh, wone mit dr Schul fertig gwä be ond hao mr gschwora, dass i abr gwiaß nia nix mit Schul mach. Ond was machsch Du?

*ggg*

Abr nie net dädet mir Di hogga lao.

Hi Manne, wie war's Radle geschdert?

Ja, s Radle isch ganz schea gwe, neidreno. I hao a gräeßre Schlaife neigmachd on hao semneviezg Killemäddr zemebrôchd. Dô ben i abr nô scho frôe gwe, wieni mea dahoi gwe be!

Gäbele, mier land di doch id hocke außr em Zug, wenns bloß no oin Sitzbladz geid!

Schdiggle, lass mi iebrlege. Wenn Du Di ietz so umguggsch bei Dir dahoim, bisch dr da sicher dassd Schual gaaaaaaaaanz weit weg isch?
*ietz mach i ggg*

... noml oin fiers Zickarle: ⚫
De andre bhald i säel :-))

neidreno, des middr Schuel kani gued vrschdao. Drom haoni ja mei aigene aufgmached! Ganz one Bierokraddi, soweiz s Fenanzamd zueglao had ;-))

Manni, wohär woisch dassda semneviezg Killemäddr zemebrôchd hosch? Hosch a Môßband dbei khett?

Nomml äbbs, wenn du deine sauschwäare Glox ahosch, nô kanni viel schnellr wetza, ass du gugga kansch *ätsch*

candice: :op

Abr fir mi wär des gwiaß net en Frâg komma.

un ois fiars Mannile un s'andr bhald i

Ob eigne oder net eigne, Schul isch Schul!

einz, zwei, drei, viar, fimpf, sex, siebn
indr Schuala wird geschriebn
indr Schuala wird gelacht
bisdr Lährer bitschbatsch macht
au, Herr Lährer, des duat weh,
morga komm i nimmerme
ibrmorga nochamôl
abr mittm Großbabba
Großbabba isch id so dumm
un hautm Lährer d'Nasa grumm

Moi Gab, so dann abr au net. Des duat em Lährer doch au weh. Au wenn mr 's net emmr glauba kâ, des sen au bloß Menscha.

Gäbele, i hao ja drnoch die Klox gar nemma ã, weil die bei dier neima schdäecked ond feschdklemmd send, ond dô kãsch du oo nemma waidle schbrenge ...

Woiß i doch, Schdiggle. War selbr au scho dbei. Lang ischs her, jung ware. Hon abr bloß mitde Schialr rumturnet un gschdriggd un so...sieba Jôhr lang. Mei erschde Schual, drei Heisr von uns entfernt, wird den Monet 100, un do gange au na. Mei Freindin isch no dort (dia ald Schachdl, ojee, dia isch sogar no a Jôhr jingr als i)

Okee, Manni. Die triffe bloß mit Schaumschdoff umwiggld.

Ond wenn em Lehrer d'Nâs romdreht werd, nâchher muaß i dann des Co-neidrino pflege ...

Abbroboo Großbabba:
        Däer Läerar en däer Schule schbrichd iber dis ond das:
        "Zom Laufen send di Fiße, zom Riechen isch di Nas!"
        Dô moind däer kloine Maxl: "Herr Läerar, was isch das?
        Bei meinem Obba riechen d Fieß, ond laufen dued die Nas!"

Hosch rächd Schdiggle. Zu de Lährer sottma liab sei, dia hons heit au nimme so oifach.

Gugget môl, do war i:

http://www.heinrich-feurstein-schule.de/index...

Scheene Schual, gell!

Heinrich? - Hmm? - Fred Feuerstein!!

@ dia Läerar hons heit au nimme so oifach. - Schdemmd! Bei deane vrzochene Kribbl!

Doch, a scheene Schual ... zmendeschd aißerlich.

Wenn etz no auf Rundgang gohsch, un s'undersche Bild aguggsch, no siehsch unsr Haus (dia hindr Hälfd isches)

am lengga Rand em ondra Driddel?

Wenn etz no auf Rundgang gohsch, un s'undersche Bild aguggsch, no siehsch unsr Haus (dia hindr Hälfd isches)

sHaus rächds unta, mitm Gribblwalmdach (ui, dô gribblds *g*)

wenn draufgliggsch, sieschs bessr

Jetz verschdeh i dia hindr Hälfd isches ...

Schee.

und alt (eldr als d'Schual)

un dô gange etz ins Neschd.

Schlôf guad Schdiggle, un alle andre!

Schlâf Du au guad, Moi Gab.

I vrabschied mi jetz au. I wensch Eich alle no en scheena Âbed ond a guade Naachd.

A guede Nachd ui baid, ond de andre oo, die wo scho em Bedd flacked. Die wo no auf send, solleze amôl riere dô hinna!

Moi Gab, Dei Schual schaut gar id so viel andersch aus wia meine:

http://www.siebold-gymnasium.de/infos/schulhaus

Schlofets guet, all mitanand (ond i mois ganz aschdändig, Gäbele...)

Ha, nocht riahre me halt no amal. D'Schtiaga muane nemmr nauf, wall e dia scho nauf be. Abr glei nauch dem Riahra gange nom en mei scheas Bettle. Des war an aschtrengendr Daag haind.

Guads Nächtle, Moi Gab. Guads Nächtle, candice. Guads Nächtle, Manne. Guads Nächtle, neutrino. Guads Nächtle, älle, dia wo grad ned mitlesagt, ond au dia, wo hoilig mitleasat.

S'Nächtle, Selimale. Muaß i grad amol schaua, ob mei alte Schul au a Netzseide hat.

Ha, da vorledschde Guhgldreffa isch's gwea. In dene drei große Tor isch d'Freiwillig Feierwehr drin ond in dem Saal oba driber hon i zwoi Johr Unterricht ghet beim Oberlehrer Ungelehrt.

I han au an ãschdrengenda Dag ghett, wenich Zeit, net älls nãgriagt was e hett solla. Schleachde Nôchrichda au no drzuanã. Ebbr isch grank worra. Net so s Wahre. Etz gange ens Bett.

http://www.fams-langenargen.de/index3.htm

un do honne sSchreibe un sLeasa glernt un bin im Sommer barfuaß in d Schual gloffa.

Goldie, des duatmr abr loid. Wenn äbbr liabs krank wiard, no isch des fiarchdig. Des kenne au. Dschinn app!

So, etz mueße wäg. Haaaalt, ersch no äbbs aziah!!!

Wie isch ui mid deam Äedbäebe gange? Handr no alle Dassa em Schrank??

I hoff s Beschde!

Hä? Erdbeba? Mô denn?

aha, dô hanne was gfonda:
http://www.spiegel.de/panorama/0,1518,622813,...

noe, also hier rom war nix zom Schbiera, wenigschdens nix was me ausm Schlôf gweckt hett.

Beim Gäble rom en dera Gegend miaßt mr's wohl schau gschbiart han. Gsait hôt se heit friah aber jô au nix.

Dô ischs uffglischdad, on wemmrs aglickt, griagt mr a Kart ãzoigt, mo's Epizentrum eizoichnat ischt:

http://www.lgrb.uni-freiburg.de/lgrb//Fachber...

Ond wo send die andre???
HILFÄÄÄÄÄÄÄÄÄÄ!!
S Wäed eana bei deam Äedbäebe doch id dr Heml uff de Kopf gfalle sei!
Bluesky!!!! Hemlherschfzaide - lass des soford sei!!

Alzo - mei Grend fiahlt ze fascht so a, alz ob wia an ausgwaxnr Heml drauf donnrat wur. Wanne naus gugg, noch siggz abr mear wianr Grauheml aus. Amend isch dr bluesky iebrnacht grau worra?