| Kommentar | Also Ameisle, dei Tibb mit dem Tag des offenen Denkmals war wirglich wirglich Gold wert! Es war a wirglich tolle Ondernehmong, dia wo mich gmacht hent, on i hett des suscht widder vrbasst.
Mr send in Seeburg gwä, desch oberhalb vo Urach, d' Erms a baar Kilomeder weider doba.
Dô geits a ganz õgwehnlichs Denkmal: an Schdolla, der wo komblett onderm Dorf durchfiehrt, on der isch em schbäda siebzehnda Jôhrhondert vo dem wirttabergischa Bauinschenjöhr Schickhardt baut worra.
Aus ma wirklich lächerlicha Grond, mua mr saga: dia hent oberhalb vom Dorf an graoßa See ghett, der isch vo ra Tuffbarriere ufgschdaut gwä vo ma kloina Bächle (den Tuffschdoi hôt de jong Erms dô em Lauf der Jahrtausende dô nãgmacht ghett). On dui Seeburger hent vrmudet, dass dô en dem See (der war zemlich diaf on hôt deswega "dr bodalose See" ghoißa) en dr Diafe donna de dickschde Fisch sei miaßdet. On nô hen dia Schlaula sich deekt: wemmer den See durch an Schdolla ablao dät, nôch köt mr dui digge Fisch rausfanga. On also hen se den Schdolla baua lao, bloß zom an dui digge Fisch nãzomkomma! Des mua mr sich môl vorschdella! (Finanziert hôt's offasichtlich dr dômôlige wirttabergische Herzog, sicher aus effentliche Gelder - der Fiahrer hôt heit xait, des war des "Schduagert oisazwanzig" vom siebzehnda Jôhrhondert).
Des Brojekt isch au, wia des soddiche Brojekder halt an sich hent, em Vrlauf no reacht en de Koschda exblodiert, weil se wega ma onderirdischa Felsa an riasa Omweg hent macha miaßa mit-m Schdolla, durch den Felsa sen se nemlich et so woich durchkomma wia durch da Tuff).
Der Schdolla isch abber eddafall nô dô, on mr hôt kenna mit Fiahronga vo dr Freiwillicha Feierwehr durchwada (dô fliaßt bis heit des Bächle durch). Dodal donkl (bis uf d' Lamba vo de Feierwehrleit), zemlich eng, doilweis au niedrich, on 's Wasser isch doils bis an d' Schenkl ganga. Mr hôt vo dr Feierwehr so a Wathos on an Helm griagt. War richdich abenteierlich, hôt reacht Schbass gmacht.
Nôch am Gang durch da Schdolla hemmr no a kloine Wanderong mit om von der Arge (Arbeitsgemeinschaft Karst und Höhlen) gmacht, der hôt ons no em Örtle on in dr Landschaft romgfiahrt on ons dui Tuffschdeinbildong on die Gegnd zoigt, wo friher der bodalose See gwä isch.
Also ensgesamt an subber scheener Dag. |
|---|
